Қытайда Қазақстан туризмі туралы түсірілген деректі фильм көрсетіледі
Қытайлық медиакорпорация өз көрермендеріне Қазақстан туризмі туралы түсірілген деректі фильмін көрсетеді.
Қазақ даласының тамылжыған табиғаты жайлы туынды аспан асты еліне бүгінен бастап жол тартады. Сондай-ақ China Media Group пен Хабар агенттігі фильмді қазақстандық аудиторияға тарату туралы келісімге келді. Бұл туралы бүгін екі ел арасындағы «Тату көршілік байланыстың жаңа бастамасы» атты іс-шарада айтылды.
Таулары аспанмен таласқан алып Алматы, ондағы Үлкен Алматы көлі, қызғылт құм, алып аңғар – Шарын шатқалы, Тянь-Шань бөктерінде орналасқан Ақсу-Жабағылы қорығы, тарихы терең Түркістан мен әсем қала Астана. Аспан асты елінің алып медиакорпорациясы түсрілім жұмыстарын дәл осы жерлерде жасағаны тегін емес. Бұл Қазақстан туризмінің қайнар көзіне айналған аймақтарының бірі. Деректі фильмде бұл орындардың көз жауын алатын көрінісінен бөлек, екі ел арасындағы қатынасты нығайтудың маңыздылығы айтылады.
Шырын Мусина, «Kazakh Tourism» ҰК» АҚ Басқарушы директоры:
- Осы деректі фильм Қазақстанның Қытайдағы туризм жылы аясында түсірілді. Түсірілім 2024 жылдың 28 сәуір мен 6 мамыр аралығында Қазақстанның негізгі туристік орындарында өтті.
China Media Group – теле, радио, интернет және өзге де платформалар арқылы хабар таратады. Компания әлемге қытай халықының мәдениеті мен ұстанымын насихаттайды. Аталған корпарациямен «Kazakh Tourism» ұлттық компаниясы қос ел арасындағы туристік ынтымақтастықты нығайту аясында меморондумға қол қойды.
Шэнь Хайсюн, China Media Group медиакорпарациясының басшысы:
- Ұлан-байтақ дала мен өзендер, сәулеті келіскен құрылыстар, жылы шырайлы адамдар. Бұл өлең жолдарына ұқсас теңеулер төраға Си Цзиньпиннің Қазақстанға берген бағасы. Сондай-ақ Қытай халқының Қазақстанға деген көзқарасы. Бүгін осындай тамаша әсермен біз Қытай орталық радиосы мен телеарансы атынан «Тату көршілік байланыстың жаңа бастамасы» атты Қытай-Қазақстан халқы арасындағы мәдени алмасу шарасын бастау үшін жиналып отырмыз.
Форумда сөз сөйлеген Мәдениет және ақпарат министрі Аида Балаева мемлекет басшысының құттықтау хатын оқыды. Президент қазақ-қытай арасындағы жан-жақты стратегиялық серіктестіктің жыл өткен сайын нығаюуына мәдени гуманитарлық байланыстың ықпалы жоғары екеніне ерекше тоқталған.
Аида Балаева, ҚР Мәдениет және ақпарат министрі:
- Атап айтқанда шығармашылық топтардың қойылымдары, музей көрмелері, көркем экспозициялар, киноиндустриядағы жаңа фильмдердің көрсетілімі, ескерткіштердің ашылуын ұйымдастыру өте маңызды. Қытай-Қазақ гуманитарлық мәдени орталығы Республикамызда Қытай орталығы ашылып жатыр. Біздің мемлкетіміздің басшылары олардың жеке достығының арқасында бүгінде қазақ пен қытай арасында ынтымақтастық нағыз қайта өрлеуді бастан өткеріп отыр.
Қос мемлекет арасындағы алыс-беріс жыл сайын артып келеді. Былтыр Қазақстан экономикасына Қытай елінен тартылған инвестиция көлемі 25 млрд доллардан асқан. Енді екі ел медиа саласын да қамтымақ.
Шерхан Абзалұлы, Ерлан Наурызбаев