Лукладағы (Непал) әуежай тағы да әлемдегі ең қауіпті әуежайлардың бірі деп танылды, деп хабарлайды «24KZ» Express Daily басылымына сілтеме жасап.
Бұған қысқа ұшу-қону жолағы, таулы аймақ және ауа райының құбылмалылығы себеп болған.
Express Daily басылымының мәліметінше, Лукладағы Тенцинг пен Хиллари атындағы әуежай 2844 метр биіктікте орналасқан.
Мұндағы ұшу-қону жолағының экстремалды параметрлері ұшу процесін қиындатады: оның ені небәрі 20 метр, ал ұзындығы 527 метр. Салыстырмалы түрде айтсақ, стандартты әуежайларда жолақ ұзындығы әдетте 3000 метрге жуық болады.
Сонымен қатар ұшу-қону жолағының 12 пайыздық тік еңісі бар, бұл ұшақтарға қону кезінде жолақ аяқталғанша жылдамдықты тезірек бәсеңдетуге көмектеседі.
Aviation Safety Network деректері бойынша, 2004 жылдан бері бұл әуежайда 56 адам қаза тауып, өліммен аяқталған жеті апат тіркелген.
БАҚ мәліметінше, ұшқыштар үшін мұнда қону мен ұшудың қиындығы бірнеше себепке байланысты:
үлкен биіктіктегі сұйытылған ауа қозғалтқыштардың қуаты мен қанаттардың көтеру күшін төмендетеді;
қысқа жолақ ұшақты тоқтатуға өте аз орын қалдырады;
Гималайдағы ауа райы санаулы минутта өзгереді - тұман немесе боран қонуға кедергі келтіруі мүмкін;
жаңбыр маусымында рейстердің бір бөлігі үнемі тоқтатылып тұрады.
Дегенмен, ашық күндері әуежай барынша жүктеліп, тәулігіне 50 рейске дейін қабылдап үлгереді.
Луклаға ұшуға тек тәжірибелі ұшқыштарға рұқсат беріледі. Непалдың авиациялық билігі қатаң талаптар қояды:
мансап жолында кемінде 100 қысқа ұшу мен қону (STOL) тәжірибесі болуы керек;
Непалдың өзінде ұшу тәжірибесі кемінде бір жыл болуы тиіс;
нұсқаушының бақылауымен Луклаға кемінде 10 рет қонуы қажет.
Егер рейстер тоқтатылса, туристер үшін бірнеше нұсқа қалады: не көрші Рамечхаптағы Мантали әуежайына ұшу, не Джири немесе Саллери ауылдарынан Луклаға дейін жаяу бару.
«24KZ» Telegram-арнасына жазылыңыз