Батыс Қазақстан облысының Бөкей Ордасы ауданында аса ірі көлемде киік мүйіздерін алып жүрген күдіктілер ұсталды, деп хабарлайды «Хабар 24».
Бұл осы аудан аумағында полиция ұйымдастырған арнайы операцияның нәтижесі. Күдіктілердің көлігінен 8 қапқа бөліп салынған 800-ден аса киік мүйізі табылды. Айта кету керек, жыл басынан бері аймақта заңсыз аң аулаудың 5, ал олардың бөліктерін пайдаланудың 15 фактісі тіркелген. Жалпы мұндай қылмыстар үшін 3 жылдан 12 жылға дейін бас бостандығынан айыру жазасы қарастырылған.
Болатбек Белгібеков, облыстық ПД баспасөз қызметінің басшысы:
- Бұл мүйіздердің құны шамамен қазір 2 миллиард теңгені құрайды. Ұсталған адамдардың басқа да қылмыстарға қатысы бар екені тексерілуде. Бұл соңғы жылдары браконьерлерден тәркіленген киік мүйіздерінің ең ірі партиясы болып табылады. Олар ҚК 128-бабына сәйкес уақытша ұстау изоляторына қамауға алынды. Оларға қатысты ҚК 339-бабы 1-бөлігі бойынша сотқа дейінгі тергеу амалдары басталды.