АҚШ-та 16 жасқа толған америкалықтар коронавирус вакцинасын ала алады

Бүгіннен бастап АҚШ-тың барлық штатында 16 жасқа толған америкалықтар ковид вакцинасын ала алады, деп хабарлайды «Хабар 24».

Массачусетс, Нью-Джерси, Вермонт және Гавайи штаттары – екпені ересектерге қолжетімді етуге көшкен соңғы штаттар. Осы орайда президент Байден америкалықтарды вакцина алуға және қолдағы бар мүмкіндікті кейінге қалдырмай дереу пайдалануға шақырды. Елдің ауруларды бақылау және алдын алу орталығының мәліметі бойынша, осы уақытқа дейін 131 миллион америкалық, яғни елдегі барлық ересектердің тең жартысы вакцинаның бір компонентін алып үлгерген. Екпенің екінші дозасы 84 миллион адамға салынған.

Дженнифер Псаки, Ақ Үйдің баспасөз хатшысы:

– Ковид індетімен күресуде жаңа деңгейге жеттік деп толықтай айта аламыз.  Бүгіннен бастап барлық штаттағы 16 жасқа толғандар вакцина қабылдай алады. Осы жолда мыңдаған маман тартылып, 60 мың вакциналау орталықтары жұмыс істеуде. Вакцина дозалары және қоры жеткілікті.

Рошель Валенски, АҚШ-тың Ауруларды бақылау және алдын алу орталығының директоры:

– Рас, күн сайын миллиондаған америкалық вакциналанып жатыр. Алайда бұл індетті жұқтырып жатқандар мен ауруханаға түсіп жатқандар да көп. Сонымен қатар кәмілетке толмағандардың арасында ковидпен ауырып жатқандардың саны артып келеді. Сол себепті арақашықтықты сақтау, қауіпсіздік шараларына мұқият қарауды қаперімізде ұстауымыз керек.