Үндістанның Мумбаи қаласында толассыз жауған жаңбырдан лай көшкіні жүріп 20 адам опат болды, деп хабарлайды «Хабар 24».
Қайғылы оқиға қаланың Махул деп аталатын кедейлер тұратын ауданында болып, таудан аққан лай-батпақ 17 адамды басып қалды. Ал Вихрали ауданында лай көшкіні жотадағы он шақты үйді шайып кетіп, 3 адам көз жұмды. Тағы оннан аса кісі жоғалып кетті. Апат аймағында іздестіру-құтқару жұмыстары жүріп жатыр. Үндістанда маусым мен қыркүйек айлары жаңбырлы маусым мезгілі саналады. Осы уақытта елде су тасқыны мен лай көшкіні жиілеп, жыл сайын мыңдаған адам жапа шегеді.