426,32 496.50 6.01
+7 (7172) 757 485 24kz@khabar.kz

Сингапурда еліміздің мәдени және табиғи мұрасына арналған көрме ашылды

  • 79
  • UPD: 20:51, 11.10.2021
Сингапурда еліміздің мәдени және табиғи мұрасына арналған көрме ашылды

Қазақстан Республикасы тәуелсіздігінің 30 жылдық мерейтойын атап өту аясында Сингапурда қала тұрғындары мен туристтер арасында кеңінен танымал «Gardens by the Bay» (Шығанақтағы бақтар) саябағында «Tulipmania 2021» атты тақырыптық көрме өтуде. Бұл туралы «Хабар 24» ҚР Сыртқы істер министрлігінің Telegram каналына сілтеме жасап хабарлайды.

Салтанатты шараға Сингапурдың парламенті, академиялық және іскерлік ортасының, дипкорпустың, қазақ диаспорасының өкілдері мен жергілікті азаматтар қатысты. Іс-шараның құрметті қонағы Сингапурдың Премьер-министр кеңсесіндегі Министр, Екінші қаржы министрі және Екінші ұлттық дамудың министрі Индрани Раджа болды.

 «Gardens by the Bay» саябағында өткізілетін жыл сайынғы көрме - Сингапурдың мәдени күнтізбесіндегі маңызды оқиға. Еліміздің мәдени мұрасы мен табиғи көрікті жерлеріне арналған биылғы көрменің тақырыбы – «Тюльпаномания» кездейсоқ таңдалмады: қызғалдақтардың отаны – қазақ даласы екенін білетіндер аз, ол жерден ежелгі уақытта бұл ерекше гүл Еуропаға әкелініп, кең танымалдыққа ие болды. Саябақтың атқарушы директоры Феликс Лоу пандемия кезіндегі қазіргі карантиндік шектеулерге қарамастан, бағалаулар бойынша көрмеге 100-ден 200 мыңға дейін сингапурлықтар мен шетелдік туристер келетініне сенім білдірді.

 Осындай ауқымдағы іс-шара екіжақты ынтымақтастық тарихында алғаш рет Сингапурда өткізіліп отыр. Мерейтойлық оқиғаның құрметіне аралдың орталық ауданында орналасқан 101 га алаңдағы «Gardens by the Bay» саябағында Ұлы Жібек жолының дәстүрлі базарлары қайта жаңғыртылды, Қожа Ахмет Ясауи кесенесінің макеті салынды, дәстүрлі қазақ киіз үйі орнатылды. Халықаралық көрмеде ұсынылған түрлі этнографиялық материалдар, қазақ тұрмысының заттары сол заманның рухын көтеруге көмектеседі.

Ашылу салтанатында сөз сөйлеген Қазақстанның Сингапурдағы Елшісі Аркен Арыстанов көрменің екі ел арасындағы өзара қарым-қатынас жылнамасында өз ізін қалдыратынына және мәдени-гуманитарлық ынтымақтастықты ілгерілетуге ықпал ететініне, сондай-ақ Жібек жолының маңызды буыны ретінде Қазақстанның туристік танымалдылығын, бай мәдени, рухани және табиғи мұрасы бар ел ретінде ілгерілетуге маңызды үлес қосатынына сенім білдірді.

Көрмені ұйымдастыруға Сингапурда тұратын қазақстандық диаспора өкілдері елеулі үлес қосты. Ішкі жабдығы бар қазақ киіз үйін осы көрме үшін «Шеберлер ауылы» отандық компаниясының мамандары арнайы жасап, ұшақпен жеткізді.

Қазақстандық музыканттардың орындауындағы ұлттық әуендер концерті ашылу салтанатына қатысқан қонақтардың жоғары бағасына ие болды.

Көрме 14 қарашаға дейін жалғасады.

Хабар 24 телеарнасы