430,43 492.25 5.92
+7 (7172) 757 485 24kz@khabar.kz

Қызылшаға қарсы вакцинацияны тезірек жүргізу ұсынылды

  • 91
  • UPD: 09:33, 13.11.2021

Әлемде қызылша ауруының таралу қаупі бар. Дүниежүзілік денсаулық сақтау ұйымы мен АҚШ ауруларды бақылау және алдын алу орталығы осындай мәлімдеме жасады. Мамандар пандемияға байланысты кейінге қалдырылған қызылшаға қарсы вакцинацияны мүмкіндігінше тезірек жүргізу қажет деп отыр.

Дүниежүзілік денсаулық сақтау ұйымының иммундау бөлімінің басшысы Кейт О' Брайен 26 елде қызылшаның өршігенін хабарлаған. Өткен жылы әлем бойынша 22 миллионнан астам бала қызылшаға қарсы вакцинаның алғашқы дозасын алмаған. Мамандар бұл індеттің таралуына әкеп соғады деп дабыл қақты. Ал Қазақстандағы жағдай тұрақты дейді мамандар. Биыл еліміз бойынша екі жағдай тіркелген. Бірақ арқаны кеңге салуға болмайды. 2019 жылы ел бойынша 13 мыңнан астам бала ауырған.

Нұршай Әзімбаев, ҚР ДСМ вакцинамен басқарылатын инфекцияларды бақылау басқармасының басшысы:

- Ел аумағында қызылшамен сырқаттанушылық биыл тұрақты. Алдыңғы жылдары қызылшаның өршуі тіркелген. Бұл 2018 жыл қараша мен 2019 жылы өте жоғары деңгейде сырқаттану тіркелген. 2020 жылы бірінші жарты жылдығында инфекция оқшауланып, бірен-саран ғана тіркелді.  

Мамандар бұл инфекцияның екпесі елімізде тек ұлттық күнтізбе бойынша егілетінін айтады. Яғни қызылшаға қарсы вакцина жоспарлы түрде 1 жастағы сәби мен 6 жасар балаларға салынады. Елімізде пандемия кезінде қалыс қалғанымен қазір екпелер  жоспарлы түрде жүргізіліп жатыр.

Айжан Амангелдиева, қалалық бала денсаулығын қорғау бөлімінің басшысы:

- Қазіргі таңда Нұр-Сұлтан қаласы бойынша жыл басынан бастап осы күнге дейін қызылша тіркелген жоқ. Біздің статистика бойынша қалада балалардың 80 проценттен астамы екпе алған. 

Ауру айтып келмейді. Сондықтан сақ болған жөн. Себебі бұл індет миға, тыныс алу жолдары мен өкпеге қатты зақым келтіреді. Мамандар қызылшаның жалғыз емі вакцина екенін айтып отыр.

Айнұр Қуатқызы, Асхат Қарақойшы, Нұрғали Мамырбаев

Хабар 24 телеарнасы