Украина парламенті: қираған баспананы қазынадан өтей ме?

Бірінші сәуірде Украина парламенті № 7198 заң жобасын тіркеді, бұл құжат: «қарулы қақтығыс салдарынан баспанасы толық әрі жартылай зақымданған Украина азаматтарына шығынды өтеу»,- деп аталады, деп хабарлайды «Хабар 24».

Осы заң аясында билік Украина тұрғындарына бомба мен зымыраннан қираған баспана құнын төлеу жағын қарастырмақ. Дей тұрғанмен жүз мыңдаған украиналыққа он млн шаршы метрден асатын баспана салып беру соғыс бүгін тоқтай қалған күннің өзінде мүмкін емес, сондықтан Жоғарғы рада үйлері жартылай қираған азаматтарға өтемақы төлеу мәселесін талқылап жатыр.

Андрей Блинов, экономист, Ұлттық банк сараптамалық платформасының экс координаторы:

- Украина Үкіметі мен депутаттық корпус - халықаралық қауымдастықтан, оның ішінде батыстан донорлық көмек ұйымдастыру мәселесін қарастырып отыр. Мұнда 150 мың баспана тұрғызу мәселесі жиі айтылады, өңірлік даму министрі де осы санды үнемі алға тартады. «Маршал жоспары» аясында да баспанасы толық қираған украина азаматтарына үй салып беру осы бағытта іске асуы мүмкін.

Құрылысшылардың көбісі соғыстың алғашқы шебінде жүр, сондықтан Украинада қазір маман жетіспейді, оның үстіне ай сайынғы бюджет тапшылығы бестен сегіз млрд еуроға жеткен, бұл - қаражаттың көп бөлігі қорғаныс саласына құйылып жатыр деген сөз. Сондықтан жаңа үйді украиналықтар жылдап күтуі мүмкін. Ал бұл қоғамда наразылық тудырып, мәжбүрлі миграция санын еселей түсуі ықтимал. Мұның алдын алу үшін билік жаңа үйден бұрын, өтемақы мәселесін алдағы бір айда шешуі тиіс, дейді экономистер.

Андрей Блинов, экономист, Ұлттық банк сараптамалық платформасының экс координаторы:

- Қазіргі күні украиналықтар қираған үйлеріне қайтып келіп, қарызданып болса да жөндеу жұмыстарын жүргізіп жатыр. Алайда олар биліктен өтемақы күтеді. Билік құр уәде берумен шектелсе, қоғам тағы дүрлігуі мүмкін не болмаса жұмысы жоқ, үйі жоқ украиналықтар жаппай шет елге көше бастауы мүмкін.

Парламенттегі № 7198 заң жобасы қыркүйек айында тағы талқылауға түспек. Бастапқы кезеңде Украинаның әр аймағындағы 36 мың пәтерге жөндеу жұмыстарын жүргізу үшін қаражат бөлу мәселесі қарастырылмақ. Толығымен жаңа үй салып беру жайлы билік талай рет айтқанмен, соғыс жағдайында бұл мүмкін емес. Өйткені елде қаражат та, құрылысшы да, құрылыс материалдарды да тапшы.

Авторы: Аида Қыдырбай