CNN: АҚШ-та аяздан төрт адам көз жұмды

АҚШ-тың оңтүстігінде де қыс қаһарына мінді.

Қалың қар жауып, боран соғып тұр. CNN хабарлауынша, аяздан 4 адам көз жұмды. Қолайсыз күн райы Флорида, Техас, Луизиана, Джорджия сияқты 8 штатты қыспаққа алған. Мұны мамандар "сирек құбылыс" деп отыр. Өйткені әдетте аталған аймақтарға Арктикалық суық ауа ағыны мүлде келмейді екен. Флорида, Луизиана, Джорджия, Алабама мен Миссисипи штаттарының губернаторлары төтенше жағдай енгізді. Лейк-Чарльз, Луизиана сияқты аудандарда боранға қатысты ескерту тарихта алғаш рет жарияланған. Жаңа Орлеанда қалыңдығы 20 сантиметр қар түсу қаупі бар. Қалада мұндай омбы қар соңғы рет 2009 жылы жауыпты. Хьюстон шаһарындағы әуежайлар жабылды. Джонсон атындағы ғарыш орталығы да жұмысын тоқтатқан. Билік тұрғындарға жолға шықпауды ескертті.