365.49 420.50 5.59
+7 (7172) 757 485 24kz@khabar.kz
ҚАЗ

«Мұзбалақ» анимациялық фильмі прокатқа шығарады

  • 296
  • UPD: 15:38, 09.10.2018
«Мұзбалақ» анимациялық фильмі прокатқа шығарады

«Қазақфильм» толықметражды анимациялық «Мұзбалақ» фильмін прокатқа шығарады.

Бұл туралы «Қазақфильмнің» баспасөз қызметі хабарлайды.

2018 жылдың 18 қазанынан бастап отандық прокатқа адам мен бүркіттің достығы туралы баяндайтын толықметражды анимациялық фильм шығады. Фильмді ҚР Мәдениет және спорт министрлігінің тапсырысы бойынша «Қазақфильм» киностудиясы өндірген. Қызықты оқиғаға толы аталған фильмнің режиссерлері - Тұрдыбек Майдан мен Тілек Төлеуғазы.

Фильмге адам баласының бүркітті қолға үйретуі арқау болған. Оқиға желісі бойынша адам мен құс бір-біріне сенім білдіре отырып, бауыр басады. Сонымен қатар фильмде қазақтың саятшылық дәстүрі де суреттеледі.

«Қазақтар бес жастағы бүркітті Мұзбалақ деп атайды. Бұл фильммен авторлар бүркіттер және олармен аңға шығу салтын көрсетуді көздеген. Фильм қазақ тілінде жасалып, орыс тіліне дубляждалған. Кинотеатрларға фильм екі тілде шығатын болады», - деді «Қазақфильмнің» баспасөз қызметінің жетекшісі Айнұр Исаева.

Екі жыл көлемінде жасалған бұл фильмде 40-қа жуық кинематографияның осы жанрында еңбек етіп жүрген отандық мамандар істеген. Ұзақтығы 65 минутты құрайтын мультфильм 2D және 3D форматында жасалған және әр секундында 24-25 кадр сурет салынған. Кейіпкерлерді дыбыстауға Ержан Жарылқасынұлы, Жанат Тыныбаев, Самат Қордабай, Төлебаев Ерғали Дүйсенұлы, Алма Әділқызы есімді театр және кино актерлері қатысқан.

Хабар 24 телеарнасы