420,76 499,50 5.62
+7 (7172) 757 485 24kz@khabar.kz
ҚАЗ


Британдық зиялы қауым Абайдың мұраларын ұлықтады

  • 238
  • UPD: 19:53, 25.07.2020

Ұлыбританияның зиялы қауым өкілдері қазақтың ұлы ақыны Абай Құнанбайұлының мұрасын ұлықтады.

Кембридж университетінің баспа үйі Қазақстанның Ұлыбританиядағы елшілігімен бірлесе ұйымдастырған онлайн конференцияға ақын-жазушылар, кәсіби аудармашылар және әлемнің түкпір-түкпірінен 100-ден астам көрермен қатысты. Пікірталасқа белсенді араласқандардың бірі шотландиялық жазушы әрі ақын, профессор Джон Бёрнсайд. Ол ұлы ағартушының Қара сөздерін ағылшын тіліне аударған. Сан алуан халықаралық әдеби жүлделердің лауреаты Абайдың өмірі мен еңбектерін зерделей келіп, батыс авторларымен үндестік тапқанын айтады. 

Джон Бернсайд, жазушы, ақын:

- Өз басым Абай және XVIII ғасырдың танымал ақыны, шотландиялық Роберт Бёрнс шығармашылығында ортақ тақырыптар көп екендігін аңғардым. Екеуі де махаббат жырларын жазып, екіжүзділік, жемқорлық және басқа да қоғамды жегідей жеген кеселдер тақырыбына қалам тербеген және туған жерін шексіз сүйген тұлғалар. 

Жыл соңында Абай шығармаларының ағылшын тіліне аударылған толық жинағының тұсаукесері өтеді. Жобаны әлемнің ең байырғы әрі беделді баспасы - Кембридж университетінің баспа үйі мен Қазақстанның Ұлттық аударма бюросы жүзеге асырады. Оның басты ерекшелігі ақын еңбектерінің тарихта тұңғыш рет қазақшадан ағылшын тіліне және әлемнің басқа да тоғыз тіліне аударылуында болмақ.

Хабар 24 телеарнасы