427,93 501,70 5.55
+7 (7172) 757 485 24kz@khabar.kz
ҚАЗ


Фонограммаға айыппұл салынбайды

  • 149
  • UPD: 21:40, 17.09.2020

Министрлік қойған талаппен өнер иелерінің кейбірі келіспейді, деп хабарлайды «Хабар 24».  

Себеп: жанды дауыста ән шырқауға арналған музыкалық аппараттар жетіспейді. Бар болған күннің өзінде сапасы сын көтермейді. Ал құзырлы орган өнер иелеріне тек жанды дауыста ән шырқау қажеттігін ескертеді.

Алуа Қонарова, продюсер:

– Концерт ұйымдастырушылары әншіні шақырған кезде райдерге сай қызмет көрсетуі тиіс. Сонда ғана жанды дауыста өнер көрсетуге болады. Бізде техника нашар. Сосын әншілердің гонорары да көп емес. Оның үстіне ұйымдастырушылар сырттан әнші шақыруға әуес. Соларға арнап қымбат аппаратура әкеледі. Қазақстандық өнерпаздарға келгенде, техника да ескі, төлем де мардымсыз. Осыдан кейін жанды дауыста ән шырқау жайлы талап қою да қисынсыз.

Дегенмен, өзгерістер алдыңғы буын өнер иелері тарапынан қолдау тапты. «Фонограмма мәселесі 10 жылдан бері көтеріліп келеді, сондықтан оған нүкте қояр сәт келді», – дейді Жеңіс Сейдоллаұлы. Қазақстанның еңбек сіңірген қайраткері осы заң жобасын әзірлеуге де атсалысқан. Сондықтан тыңдарман талғамына сай болу үшін әріптестерін барынша шынайы болуға шақырады.

Жеңіс Сейдоллаұлы, Қазақстанның еңбек сіңірген қайраткері:

– Ең алдымен, бұл жерде көрермен таңдау мүмкіндігіне ие болады. Әнші концерт қоятын болса, құлақтандыруда «осынша ән фонограммада, осынша ән жанды дауыста болады» деп көрсетуге болады. Осы мәселе қозғағалы көп болды. Нүктесіне жетті. Енді ұят болады. Әншілер бар мүмкіншілігін салып, жанды дауыста шырқап жатыр.

Сонымен кез келген әртіс сахнаға шығар алдында қанша әнін жанды дауыста шырқайтынын алдын ала хабарлауы тиіс. Заң талабы осындай. Бірақ оны өнер иелері қаншалықты орындайтынына уақыт төреші. Оның үстіне қандай жауапкершілік жүктелетіні де белгісіз.

Күміс Сейітова, ҚР Мәдениет және спорт министрлігінің департамент директоры:

– Норма енді ғана енгізіліп жатыр. Оны тәжірибеге енгізбей, ештеңе айта алмаймыз. Мүмкін заңбұзушылықтар мүлде болмайтын шығар. Бұл жағын әнші немесе ұйымдастырушының ар-ұятына қалдырамыз. Егер заңбұзушылықтар көбейіп кетсе, министрлік Әкімшілік кодекске өзгеріс енгізеді, яғни айыппұл салу жағын қарастырамыз.

Заң Мәжілісте мақұлданды. Енді Сенат отырысында қаралып, өзгеріс енгізілуі де мүмкін. Әзірге қоғам тарапынан құжатқа тек оң баға беріліп отыр.

Авторлары: Рауан Мыңбаев, Асхат Қарақойшиев, Ержан Қанапияұлы

Хабар 24 телеарнасы