Берлин кинофестивалі басталды

Германияда 73-Берлин кинофестивалі басталды. Биыл көрермендер 300-ге жуық фильмді тамашалайды.

Мәдениет, өнер саласындағы ең беделді, көпшілік күткен іс-шараның ашылуына санаулы секунд қалды. Берлинале сарайының алдына берлиндіктер мен туристер дәстүрге сай сап түзеп тұр. Олар күткен танымалдар қызыл кілемнің үстінде. Әйгілі "Тақтар ойыны" телехикаясының жұлдызы Питер Динклейдж, актер және режиссер Шон Пенн, актриса Энн Хэтэуэй және т.б. көпшіліктің қошеметіне бөленді. 

Стивен, кинофестивальдің қонағы:

- Мен Тайваннан, ал құрбым Гонконгтан арнайы келдік. Берлиндегі бұл шара  әлемдегі ең қызық фестивальдің бірі. Қызыл кілемнен өткен жұлдыздарды көріп тұрмыз. Шынын айтсам,келгеніме қуаныштты қуанып тұрмын. Өкінішке орай коронавирусқа байланысты, біз қатарынан екі жыл бұл шараға қатыса алмадық. Енді, ол шектеулер артта қалды, әлемді тануға кедергі жоқ. 

Канн және Венециялық фестивальмен қатар Берлинале Еуропадағы ең үздік үштікке кіреді. Биылғы фестиваль украин халқы мен Ирандағы наразылық білдірушілерге қолдау белгісімен өтіп жатыр.

Озлем, актриса:

- Фильмнің режиссері туралы оқып отыр ем, билеттер таусылып қалды. Келесі фильмге ойланбастан сатып алдым. Шынында да билеттер ыстық бәліштей тез өтіп жатыр.

Торғай, актер:

- Бұл кинофестивальге Венадан екінші рет келуім. Өте қызық шара. Біз актерлер режиссерлермен және продюсерлермен байланыс орнатуға келдік. Келесі жолы қызыл кілеммен жүріп өтеміз деген ниеттеміз.

Биыл Берлиналенің негізгі бағдарламасында 19 фильм көрсетіледі. Дәл сол үздіктер негізгі марапат үшін күреседі. Ал жеңімпаздардың есімі  25 ақпанда белгілі болады.

Сымбат Ғалымжанқызы, Шолпан Найманбаева