389,98 432,20 6.09
+7 (7172) 757 485 24kz@khabar.kz
ҚАЗ


Оңтүстік Кореяда оқитын қазақ жігіті еліміздің даңқын асқақтатып жүр

  • 2631
  • UPD: 08:27, 04.01.2018

Қазақстандық студент Дастан Валиулинді Оңтүстік Кореяда «Қазақстанның мәдени елшісі» деп атайды. Кукмин университетінің үшінші курсында оқитын ол, оңтүстік корея телеарналарына танымал болып үлгірді. 

Қазақстандық Дастан Валиулиннің өмірі университет, студия, хоккей алаңы арасында өтіп жүр. Ол Оңтүстік Кореяға білім алу үшін төрт жыл бұрын келген. Корей тілін үйренгені соншалық оны жергілікті телеарналар шақыра бастаған. Телебағдарламалардың бірінде ол оңтүстік кореялық халыққа өз отаны туралы айтып беріп, бауырсақ пісіру мен етті қалай асатынын үйретті.

Бағдарламадан үзінді:

Жүргізуші: Қазақстанның қай жерде екенін көбі біле бермейді.

Дастан: Иә, шынымен, кейбірі білмейді. Қазақстан –  жер көлемінің үлкендігіне байланысты әлемде тоғызыншы орында. Ол Еуропа мен Азияның түйісінде орналасқан. Қазақ сөзі ерікті, тәуелсіз адам деген мағынаны білдіреді.

Жақында Дастан Пхенчханда өтетін олимпиадалық және паралимпиялық ойындарға Қазақстан елшісі ретінде қатысады. Оның міндеті - Олимпиада қонақтарына корей тілінде Корея туралы айтып беру және қазақстандықтарға Корея мәдениеті туралы қазақ, орыс тілдерінде ақпарат беру.

Ли Сын Тхэк, телепродюсер:

- Мен Қазақстанда  ғарыш алаңы бар екенін және оның ашық ғарышқа ұшу үшін тиімді әрі қолайлы жер екендігі туралы  алғаш рет  Дастаннан естідім. Мұндай деректерді корейліктер білмейді. Қазақстанның тұрмысы мен салт-дәстүрі жөнінде біз телеарнада бірқатар бағдарламалар дайындап жүрміз. Елінің беделін айқындап беруде Дастанға үлкен жауапкершілік артып отырмыз.

Дастан Валиулин, Пхенчханда өтетін Олимпиададағы Қазақстан елшісі:

- Мен өзімді Кореяда актер ретінде, жүргізуші ретінде сынап көргім келеді. Жергілікті халыққа Қазақстан туралы айтқым келеді. Сонымен қатар, арманымдағы жұмысымды тауып, Қазақстан мен Кореяны өзара байланыстыратын өзімнің кәсібімді ашқым келеді.

Қазақстанға келу бақыты бұйырған оңтүстік кореялықтар біздің елді «сұлу адамдар елі» деп атайды екен. Сұлу қазақ қызының бет-бейнесін волейболшы Сабина Алтынбекова қалыптастырса, әдемі жігіттің бейнесін студент Дастан Валиулин қалыптастырып келеді.

Авторлары: Владислав Цой, Ли Сан Хён

Хабар 24 телеарнасы