383,69 432.40 6.09
+7 (7172) 757 485 24kz@khabar.kz
ҚАЗ


Астанада қоғамдық көлікте билетсіз жүрген бес жолаушыға айыппұл салынды

  • 852
  • UPD: 23:18, 04.01.2018
Астанада қоғамдық көлікте билетсіз жүрген бес жолаушыға айыппұл салынды Фото: astana.gov.kz

Қаланың қоғамдық көліктерінде билетсіз жүрген жолаушыларды анықтау мақсатымен рейдтік іс-шаралар бастауын алды.

Бұл туралы «Астана LRT» ЖШС-ке сілтеме жасап, Астана әкімдігінің баспасөз қызметі хабарлады.

Астананың қоғамдық көліктерінде Астана қаласының жолаушылар көлігі басқармасының басшысы Бекмырза Игенбердиновтың бастамасымен құқықбұзушыларды анықтау мақсатында рейдтік іс-шаралар жүргізіліп жатыр. Көліктік бақылау департаменті «Астана LRT» ЖШС мен Астана қаласы ІІД-нің жергілікті полиция қызметі бірлесіп ұйымдастырып жатқан шара қалалық бағдарлардың барлығын қамтиды.

«Рейд күндері қоғамдық көлікте жүргені үшін төлемнің жүзеге асу фактісін тексеретін көліктік бақылау департаментінің жұмысы күшейтіледі. Жолақысын төлеуден жалтарғандығы үшін жауапқа тарту жөнінде халықты ақпараттандыру, қоғамдық көлікте билетсіз жүрген азаматтарды анықтау, жолақысын төлеуден жалтару фактілерінің және қоғамдық көліктердегі жолақысын төлеуге қатысты басқа да құқықбұзушылықтардың алдын алу аталған акцияның мақсаты болып табылады», делінген «Астана LRT» ЖШС хабарламасында.

Еске салайық, 2018 жылдың 1 қаңтарынан бастап Астананың барлық бағдарлы көлік құралдары жолақысын төлеудің электронды жүйесімен жабдықталған. Бұдан бұрын қолданылған жыртылмалы орама билеттер енді берілмейді. Бұдан былай жолаушылар ақшалай төлемді жүзеге асырған жағдайда билеттерді жолақысын төлеудің электронды жүйесі арқылы алады. Сонымен қатар жолаушылардың көліктік картаның көмегімен де жолақысын төлеу мүмкіндігі бар. Ол үшін жолаушы картасына алдын ала ақша құйып алуы тиіс.

2018 жылдың басынан 5 жолаушыға қоғамдық көлікте билетсіз жүргені үшін әкімшілік айыппұл салынды.

Қоғамдық көлікте жолақысын төлемегендерге жергілікті полиция қызметі 2 айлық есептік көрсеткіш (АЕК) көлемінде әкімшілік айыппұл салады. Ол 4810 теңгені құрайды.

«Астана LRT» ЖШС-те белгілі болғандай, мұндай акциялар жүйелі түрде өткізіледі деп жоспарлануда. 

Мұнымен қоса рейд барысында жолаушылардың билетсіз жүруіне мүмкіндік берген 15 кондуктор анықталған болатын. Мұндай әрекеті үшін кондукторларға 5 АЕК көлемінде, яғни 12025 теңге айыппұл салынады.

Хабар 24 телеарнасы