386,34 428,03 5.89
+7 (7172) 757 485 24kz@khabar.kz
ҚАЗ


Астанадағы балабақша кезегіне қалай тұруға болады?

  • 809
  • UPD: 11:50, 12.02.2019
Астанадағы балабақша кезегіне қалай тұруға болады?

Балаңыз 2 жасқа толған соң оны балабақшаға орналастыру үшін қандай әрекет жасау қажет?

Қандай жағдайда балабақша кезегінен шеттетілесіз? Мектепке дейінгі мекемеге кезекке тұру жүйесінің жай-жапсары қандай екендігін Елорда Инфо «Астана ақшамы» газетіне сілтеме жасап ұсынады.

Алдымен ата-ана электронды цифрлық қолтаңбаны қолдана отырып, www.e.astana.kz электронды жүйесіне кіруі керек. Одан кейін баланың аты-жөні, ЖСН-і сияқты қажетті құжаттар толтырылады. Егер ата-ана жеңілдігі бар санаттағы азаматтар қатарынан болса, онда жүйеде қосымша тиісті құжаттар тіркеледі. Онда ата-ананың телефон нөмірі мен электронды мекенжайы міндетті түрде көрсетілуі тиіс.

SMS-хабарлама алғаннан кейін мектепке дейінгі ұйымды таңдау үшін ата-анаға 3 жұмыс күні уақыты беріледі. Осы уақыттан кейін (4-інші күні, таңғы сағат 7:00-де) кезегінің санына қарамастан, кез келген ата-ана барлық балабақшалардағы бос орындарды көруге мүмкіндік алады. Егер ата-ана берілген уақыт ішінде мектепке дейінгі мекемені таңдап үлгермесе, олардың кезегі сақталады.

Балабақша таңдалғаннан кейін балаға жолдама беріледі. Осы жолдамамен 5 жұмыс күні ішінде көрсетілген мектепке дейінгі ұйымға бару қажет. Егер бармаған жағдайда 30 күнтізбелік күнге дейін ұзартуға болады. Осы уақыт ішінде таңдау жасаған балабақшадағы орын сақталады.

Егер ата-ана балабақшаға жолдама алғаннан кейін 5 жұмыс күні ішінде аталған мекемеге бармай, уақытты да создырмаса, жолдама автоматты түрде жойылып, 10 жұмыс күні ішінде тоқтату тізіміне жіберіледі. Өтінім тоқтатылған тізімде болған кезде, жолдама алу мүмкіндігі бұғатталады. Егер өтініш беруші жолдаманың уақытын екі рет өткізіп алса, бала кезектен автоматты түрде шығарылады.

Балалар балабақшаға орналасқан сайын кезек санының азайып, яки өсіп кетуі де мүмкін. Бұл жеңілдігі бар санаттағы үміткерлердің кезекке тұру немесе шығуына байланысты.

Жүйе жеті жасқа толған барлық балаларды автоматты түрде кезектен алып тастайды. Сол сияқты ата-ана бір жыл ішінде балабақшадан орын алуға қызығушылық танытпаған жағдайда да кезек жойылады.

Егер 3 жаста немесе одан үлкен бала мемлекеттік тапсырыс бойынша жұмыс жүргізетін жекеменшік балабақшаға жолдама алған уақытта кезек нөмірі маңызды болмайды. Ал балабақша кезегінде тұрған балаңыз 4 жастан асса, шағын орталыққа тегін жолдама ала аласыз.

Сондай-ақ кез келген мектепке дейінгі ұйымға, оның ішінде мемлекеттік білім беру тапсырысы бойынша жұмыс істейтін жекеменшік балабақшаға жолдама алған жағдайда да автоматты түрде кезектен алынады. Өйткені баланы мектепке дейінгі тәрбиемен және оқытумен қамтамасыз ету қызметінің мүмкіндігі тек бір рет беріледі.

Хабар 24 телеарнасы