379.54 427.25 5.93
+7 (7172) 757 485 24kz@khabar.kz
ҚАЗ


Күрделі операциялар өз елімізде жасалатын болады

  • 374
  • UPD: 08:20, 26.03.2019

Елімізде екі жүзден аса сүйегі сынғыш және тумысынан бойы өспей қалған бала бар.

Оларға тиісті көмек көрсетілмей келеді. Жаны қиналған ата-ана амалсыздан баласының тағдырын шетелдік дәрігерлерге аманаттауға мәжбүр. Енді астаналық мамандар осы олқылықтың орнын толтырмақ. Қазір қалада ғылыми-тәжірибелік шеберлік сағаттары өтіп жатыр. Оған украиналық дәрігерлер арнайы шақыртылған. Шара барысында 3 балаға операция жасалады.

8 жасар Адэлланың арманы бұл. Құрдастарымен асыр-сала, аяғына нық тұрып, жүріп кеткісі келеді. Төсекке таңылған бүлдіршіннің диагнозы – «жетілмеген остеогенез» немесе «хрусталь бала». Назгүл Жамантаева қызын жалғыз тәрбиелеп отыр. Жұмыс істейтін мүмкіндігі жоқ. Артық қимыл жасаса, сүйектері морт сынатын баласына мемлекеттен көмек болмағасын Украинаға апарды.

Назгүл Жамантаева, ата-ана:

- Баламның диагнозын 6 айлығында білдім. Дәрігерлердің бақылауында болғанымызбен, емделмеді. Қайырымды жандардың арқасында Харьков қаласындағы ортопедия-травмология институтына барып жүрміз, жақында екінші емін алдық. Операцияға толық дайын болуымыз үшін тағы бес рет ем алу керек. Қазір қызым отыра бастады. Қолымен жұмыс істейді. Бірақ шетелдік ем өте қымбат әрі балам алыс жолды көтере алмайды.

Адэлланы емдеген дәрігерлер қазір Астанада жүр. Олар медициналық  университет мамандарының шақыруымен ғылыми-тәжірибелік шеберлік-сағатын өткізіп, өз білгендерін отандық дәрігерлерге үйретуде. 30 жылдық тәжірибесі бар білікті мамандар ахондроплазия мен жетілмеген остеогенез дертін емдеуде озық тәжірибеге ие.

Сергей Хмызов, профессор, балалар клиникасының басшысы /Украина/:

- Остеогенезді емдеу тәсілі жаңа, препараттар да жақында пайда болған. Бүгінде халықаралық хаттамалар жасалды. Ал бойы өспей қалған балаларға профессор Елизаровтың тіреу аппаратын пайдаланғанбыз. Қазір заман басқа, біз соңғы үлгідегісін жасап шығардық. Әр балаға жекелей. Науқастардың бойы өседі, жүре бастайды. Тек сену керек.

Тұқым қуалайтын бұл дерттер сирек кездеседі, бірақ науқастар саны дендеп барады. Есесіне білікті генетиктер тапшы. Украиналық мамандардың пациенттері Қазақстаннан бөлек БАӘ, Ресей, Беларусь, басқа да мемлекеттерде тұрады. Ал заманауи эндропротезде арнайы зауытта шығарылады.

Болатбек Досанов, ортопед-травматолог дәрігер:

- Қазақстанда 150-200 бала осындай ақаумен тіркелген. Олар, өкінішке қарай, дұрыс ем алмайды. Сондықтан біз осы емге дисциплинарлы команда жинап алдық. 10 дәрігер. Егер де бүкіләлемдік хаттаманы қарайтын болсақ, бұл ақаулар тек командамен емделеді.

Шеберлік сағатында тумасынан бойы өспей қалған 3 балаға операция жасалады. Олардың қолы мен аяғын 7-15 см ұзарту көзделген. Мұндай операция елімізде бұрын-соңды жасалмаған. Айта кетерлігі, инновациялық аппарат сүйекке бекітіліп, жеткіншекпен бірге өсетін болады. Ал отандық дәрігерлер дайындап жатқан 5 жылдық ғылыми-техникалық жоба аталмыш дерттерді елімізде емдеп, операция жасауға жол ашады.

Авторлары: Мерей Мұратханқызы, Ерлан Наурызбаев, Жандос Битабаров

Хабар 24 телеарнасы