378.98 423.00 5.88
+7 (7172) 757 485 24kz@khabar.kz
ҚАЗ


Кентауда 180 отбасы баспаналы болды

  • 165
  • UPD: 09:20, 08.05.2019

Отан қорғаушы күні мен Жеңіс мерекесіне орай Түркістан облысында 180 отбасы баспаналы болды.

Кентау қаласында жетім және ата-анасының қамқорлығынсыз қалған балаларға, әлеуметтік аз қамтылған отбасыларға және тұрғын үй кезегінде тұрған бюджеттік сала қызметкерлеріне пәтер кілті табыс етілді.

Кентауда мереке қарсаңында 60 пәтерлі 3 көпқабатты тұрғын үй ел игілігіне пайдалануға берілді. 180 отбасы баспаналы болды.

3 бөлмелі пәтерге қол жеткізіп, баспана бақытын сезініп жатқан жандардың бірі - Арайлым Байдүйсенова. Жалғызбасты ана 6 жылдан бері тұрғын үй кезегінде тұрған. 3 баласын бір өзі тәрбиелеп, бағып-қағып отыр. Жылдар бойы пәтер жағалап, баспана азабын бір кісідей-ақ тартқан.Енді міне көптен  күткен арманына қол жеткізді.  

Арайлым Байдүйсенова, Кентау қаласының тұрғыны:

- Алдында пәтер жалдап тұрдым. Міне, енді неше жылдан бері армандаған үймізге қолымыз жетті. Рахмет сіздерге. Жеке-жеке бөлмесі бар. Асханасы да кең, барлық жағдайы жасалған. Қуаныштымын. Қуанышымда шек жоқ.  Рахмет!

Қоныстой тойлаушылардың бірі Әлпиевтар отбасы. 6 бала өсіріп отырған жанұя өз шаңырақтарына кіріп, шаттыққа бөленуде. Отағасы Ержан 10 жылдан бері тұрғын үй кезегінде тұрғанын айтады. Өзі ХҚКО жұмыс істейді. Бұған дейін келіншегі екеуі бала-шағасымен бірге ата-анасының үйінде тұрған.

Ержан Әлпиев, Кентау қаласының тұрғыны:

-2 ұл, 4 қызым бар. Енді өздерінің бөлмелері болады, құдай қаласа. Қуанышымыз шексіз. Осындай өзіміздің баспанамыз болып жатқанына куә болып жатырсыздар. Үлкен рахмет.

КТМ: Айта кетейік, қолданысқа берілген 180 жаңа пәтердің 37-сі жетім балаларға, 90-ны көпбалалы отбасыларға, ал қалғаны тұрғын үй кезегінде тұрған бюджеттік сала қызметкерлеріне «Нұрлы жер» бағдарламасы арқылы үлестірілді. Салтанатты шарада аймақ басшысы мұндай қуаныштар мұнымен шектелмейтінін, үй кезегінде тұрған барлық азаматтар кезең-кезеңімен баспаналы болатынын жеткізді.

Ерлан Алдыбаев, Кентау қалалық құрылыс бөлімінің басшысы:

- 2018 жылы Кентау қаласы бойынша 60 пәтерлі 5 көпқабатты тұрғын үйдің құрылысы басталған болатын. Биылғы жылға өтпелі болды. Сол 5 үйді биыл толығымен бітіріп, тапсыру жоспарланып отыр. Мінекей бүгін соның ішінде 3 тұрғын үйдің құрылысын аяқтап, кезекте тұрған тұрғындарға беріп жатырмыз. Қалған 2 үйді тамыз айына дейін бітіреміз.

Жалпы «Нұрлы жер» мемлекеттік бағдарламасы аясында салынып жатқан осы 300 пәтерлі 5 көпқабатты нысандардың жалпы жобалық-сметалық құны 2 175 млн теңгені құрайды. Айта кетейік, биыл Кентау қаласында дәл осындай 60 пәтерлі 10 көп қабатты тұрғын үйдің құрылысы басталды. Келесі жылы тағы да тұрғын үй кезегінде тұрған 600 отбасы қоныс тойын тойлайтын болады.

Авторлары: Жандос Жұмабек, Ерболат Әбіш

Хабар 24 телеарнасы