384,36 431.47 6.11
+7 (7172) 757 485 24kz@khabar.kz
ҚАЗ


Каспийде шомылуға қауіпті аймақ саны төртке жетті

  • 210
  • UPD: 14:32, 03.07.2019

4-шағын аудандағы жартасты жағалау мен қала сыртындағы Шора каналы адам өміріне аса қатерлі саналады, деп хабарлайды «Хабар 24» тілшісі.

Енді олардың қатарына Түпқараған ауданындағы екі бірдей шомылу орны қосылуы мүмкін. Оларды тұрғындар 43-шақырым және Голубая бухта деп атап кеткен. Осы аймақтарда қайғылы оқиғалардың алдын алу үшін тиісті ұсыныс облыс мәслихатына жолданды. Жуық арада қаулы шықса, Ақтаудан қашық орындарда рейдтік шаралар жүргізілмек.

Бұл – 4-аудандағы тау шатқалы. Жағалауда «Суға шомылуға болмайды» деген тақтайша тұр. Алайда оған назар аударған адам жоқ. Түбінде үшкір қырлы жартастар жатқан жерге секіріп, мәз-мейрам. Қасына полицейлер барған сәтте ғана асықпай судан шығады. Құтқарушылар өз өміріне жауапсыз қараудың соңы қайғылы жағдайға әкелерін қанша рет ескертсе де, осы көрініс жылда қайталанады. Былтырдың өзінде осы маңда екі адам су кетті.

Қала сыртындағы Шора каналы – балықшылардың сүйікті орны. Теңіз суын тұщыту мекемесінен ағып шығатын жылы суға шомылуға әуес тұрғындар бұл жерге қысы-жазы келеді. Түбінде иірім көп жерге түсудің өмірге қауіпті екені ескертілген жазу да тұр. Тіпті, канал бойлай темір қоршау қойылса да, халық сымды қиып кіре береді.

Еділ Есбосынов, «Жедел құтқару жасағы» ММ бас құтқарушысы:

– Біздер халыққа барынша ескертіп жатырмыз. Түсуге болмайтын қауіпті аймақ екенін. Тыңдамаған жағдайда полиция қызметкерін шақыртып, бір рет ескерту шарасы болады. Егер оны да тыңдамаған жағдайда, 2018 жылғы қалалық мәслихат депутаттарының шешімімен 364-бап бойынша 2 АЕК көлемінде айыппұл төлеуге мәжбүр болады.

Былтыр облыс көлемінде он адам суға кетті. Ал жыл басынан бері бес қайғылы дерек тіркеліп отыр. Осының алдын алу үшін жері теңізбен шектесетін Түпқараған мен Қарақия аудандарында да рейдтік шаралар жүргізіледі. 

Манарбек Мұханбетов, облыстық ТЖД басшысының орынбасары:

– 2019 жылдың суға түсу маусымының басталуына байланысты тағы бір-екі учаскені ұсынып отырмыз облыс мәслихатына. Оның біреуі – 43-километр. Сосын Голубая бухта. Ол Түпқараған ауданында орналасқан. Онда да соңғы жылдары көптеген адамдар суға кетті.

Күн ыстықта теңізге шомылатындар қатары артады. Осы себепті күн сайын сағат 14:00-ден кешкі 22:00-ге дейін суға түсуге қауіпті аймақтарда жылжымалы құтқару бекеттері жұмыс істейді. Сондай-ақ 35 ерікті жағалауда тынығушылар арасында үгіт-насихат шараларын жүргізеді.

Авторлары: Талғат Исламұлы, Саламат Бекбаев

Хабар 24 телеарнасы