384,77 427,95 6.05
+7 (7172) 757 485 24kz@khabar.kz
ҚАЗ


Арыстағы оқ-дәрі қоймасы көшіріледі

  • 756
  • UPD: 23:58, 04.07.2019

Арыс пен маңайындағы ауылдардан 30 мың 700-дей оқ-дәрі табылған, деп хабарлайды «Хабар 24» тілшісі.

Олар қаладан 60 шақырым жердегі арнайы қоймаға жеткізіліп, залалсыздандырылып жатыр. Сондықтан тұрғындарға снарядтардан төнетін қауіп жоқ. Бұл жөнінде Қорғаныс министрлігінің өкілдері мәлімдеді.

Жарылыс кезінде жан-жаққа қашып, жағдай тұрақталған соң үйлеріне оралған арыстықтардан күніне 50-60 шақырту түседі екен. Жалпы, 500-ден астам тұрғын «түрлі оқ-дәріге ұқсас заттар тауып алдық» деп әскери органдарға хабарласқан.

Қорғаныс министрлігінің мәліметінше, екі апта көлемінде қару-жарақ, жарылғыш снарядтар Арыстан көшіріле бастайды. Қазіргі таңда әскерилер дайындық жұмыстарын жүргізіп жатыр. Оған қажетті қаражат ішкі резервтен қаралады. Арыста оқ-дәрі қоймасы болмайды, тек әскери бөлімдер қалады. 

Ермиян Биятов, ҚР Қорғаныс министрлігінің өкілі:

– Ақдала, Диірмене ауылдарынан табылды. Қазір сол екі ауыл таза, оқ-дәрілер жоқ. Бізде полигон бар, сол жерге оқ-дәрілерді жинаймыз да, одан кейін залалсыздандырылады.

Арыс қаласының маңайындағы Ақжол, Ақдала ауылдарының үйлері де жарылыстан зақымданды. Сондықтан сол елді мекен тұрғындары да арыстықтарға берілетін 100 мың теңгеден шет қалмайды. Ертең Арыста ауыл шаруашылығы өнімдерінің жәрмеңкесі өтеді. Онда агроөнімдер нарық бағасынан 30% төмен бағада сатылатын болады.

Авторы: Қамбар Бекенов

Хабар 24 телеарнасы