422.40 509.00 5.60
+7 (7172) 757 485 24kz@khabar.kz
ҚАЗ

Ұшақ апатын тергеу ісі: ІІМ барлық құжаттар мен деректерді зерттеуде

  • 515
  • UPD: 11:54, 28.12.2019
Ұшақ апатын тергеу ісі: ІІМ барлық құжаттар мен деректерді зерттеуде

Алматы облысы аумағында Fokker-100 жолаушылар ұшағының апатқа ұшырау фактісі бойынша ҚР Қылмыстық кодексінің 344-бабының 3-бөлігіне сәйкес сотқа дейінгі тергеу жүргізілуде, деп хабарлады Ішкі істер министрлігінің баспасөз қызметі.

«ІІМ ұшақтың апатқа ұшырауына әкеп соққан себептер мен жағдайларды сапалы және объективті тексеру жүргізеді. Тергеу барысында барлық құжаттар, аудио және бейнежазбалар зерттеледі. Әуе кемесінің жай-күйіне бірқатар сараптама тағайындалды», - деді Ішкі істер министрі Ерлан Тұрғымбаев.

ІІМ басшысы тергеушілер әуе апатына әкеп соқтырған барлық оқиғалардың хронологиясын қалпына келтіру керектігін атап өтті. Осы мақсатта қызметкерлер ұшуды ұйымдастыру мен өткізуге қатысатын барлық жердегі және авиациялық қызметтердің жұмысын тексереді, жауапты тұлғалардан жауап алу және осы рейстің жолаушыларынан сауалнама алу жүргізіледі.

Ұшу-қону жолағына тексеру жүргізілді. Әуе кемесінен өздігінен жазғыш құралдары мен борт журналы алынды. Қазіргі уақытта ұшақтың құлау ауданын тексеру жалғасуда.

Халықаралық талаптарға және осы санаттағы қылмыстық істерді тергеу ерекшеліктеріне сәйкес оған халықаралық авиация комитетінің және ұшақты дайындаушы зауыттың өкілдері қатысады, олармен бірге алынған өздігінен жазу құралдарындағы жазбалардың мәнін анықтау, кеме қозғалтқышы мен оқиға орнын тексеру жүргізіледі.

Апатқа ұшыраған ұшақ 1996 жылы Голландияда Fokker зауытында жасалып, 2020 жылдың 21 мамырына дейін ұшу жарамдылығы сертификатына ие болғаны анықталды.

Жедел-тергеу тобы бірнеше нұсқаларды, соның ішінде ұшақтың техникалық ақауын, ауа райы және метеорологиялық жағдайларды, сондай-ақ ұшу кезінде жіберілуі мүмкін қателерді пысықтайды.

28 желтоқсандағы жағдай бойынша Алматы қаласының медициналық мекемелерінде 47 зардап шеккен адам, оның ішінде 9 бала стационарлық емделуде. 4 зардап шеккен адамға медициналық тексеруден кейін амбулаторлық ем тағайындалып, үйлеріне жіберілді. Қаза болғандардың саны өзгерген жоқ (12 адам).

Хабар 24 телеарнасы