421,91 511.30 5.59
+7 (7172) 757 485 24kz@khabar.kz
ҚАЗ

Балқаш маңында айы-күні жақындап отырған келіншек көлік ішінде босанып қалды

  • 450
Балқаш маңында айы-күні жақындап отырған келіншек көлік ішінде босанып қалды

Қарағанды облысында бүгін боран басылып, аяз күшейді, деп хабарлайды «Хабар 24».

Қазір күре жолдың біраз бөлігі ашылып, қатынас қалыпқа келді. Енді біразын қардан аршып жатыр. Төтенше жағдай қызметі өткен түнде 322 адамды қар құрсауынан құтқарған. Олардың көпшілігі жылыту бекеттеріне орналастырылып, ыстық тамақ берілді. Ал жолда тұрған жүк көліктерінің жүргізушілеріне ас-ауқат пен жанар-жағармай жеткізілді. Денсаулық сақтау басқармасының мәліметінше, соңғы екі күнде 500-ге жуық адам дәрігердің көмегіне жүгінген. Ақтоғай селосынан Балқаш қаласына бағыт алған жедел жәрдем көлігі діттеген жеріне жете алмай, айы-күні жақындап отырған келіншек көлік ішінде босанған. Фельдшер Баян Ысқақова Нарманбет ауылының тұсында баланың кіндігін кесіп, анаға барынша көмек көрсеткен. Әлеуметтік желі қолданушылары сәбидің есімін Боранбай қойған деседі.

Мейрамгүл Алпысбаева, Балқаш қалалық перзентханасының дәрігері:

– Ысқақова Баянның біліктілігінің арқасында әйелді аман-есен босандырды. Сәби Балқаш қаласындағы перзентханаға аман-есен жеткізілді. Қазір баланың да, ананың да жағдайы жақсы, бала анасының жанында.

Хабар 24 телеарнасы