418,17 495,30 5.70
+7 (7172) 757 485 24kz@khabar.kz
ҚАЗ


Нұр-Сұлтанда медициналық бетперделер шығаратын жаңа кәсіпорын ашылды

  • 156
  • UPD: 11:01, 10.07.2020
Нұр-Сұлтанда медициналық бетперделер шығаратын жаңа кәсіпорын ашылды фото: Бауыржан Жуасбаев

Нұр-Сұлтан қаласында медициналық бетперде шығарумен айналысатын «Bioniсk-Pro» өндіріс орны ашылды.

Өнеркәсіптің ашылғанына небәрі екі апта болды. Осы күнге дейін 1 млн-нан астам бетперде шығарылған, деп хабарлады ҚР ИИДМ баспасөз қызметі.

Өндіріс орнының директоры Арон Қадыровтың айтуынша, өнеркәсіп тәулігіне 180 000 дана бетперде шығара алады. Қазіргі таңда сұранысқа сәйкес, тәулігіне 80 000-120 000 дейін медициналық бетперде өндірілуде. Бұл бетперделер қаланың дәріханалары мен емханаларына жеткізіледі.

Бетперде өндірісі автоматтандырылған және жартылай автоматтандырылған екі станок арқылы жүргізіледі. Бірінші станок үш матаны біріктіріп, үтіктеп, үш рет бүктеп, жиектеріне тігіс салады. Келесі станокта бетперделер арнайы өлшеммен кесіліп, құлаққа тағатын резеңкесі желімделеді. Одан кейін мамандар бетперделерді тексеріп, санап, арнайы қаптамаларға 50 данадан салып отырады.

Бетперде өндірісіне арналған маталар мен резеңкелер Түркия мен Ираннан жеткізіледі. Ал станоктар Қытайдан сатып алынды. Өнеркәсіп ошағының мамандары Шанхай және Гуанчжоу қалаларына барып, станоктарда жұмыс істеуді арнайы үйреніп келді.

«Маскалар арнайы су өткізбейтін, сапа бақылауынан өткен маталардан жасалады және міндетті түрде үш қабатты болады. Айта кету керек, мақталы, тоқыма маталардан тігілген маскалардың қорғаныш деңгейі төмен болады және мұндай маскалар суланады да, микроб жинайды. Сондықтан, арнайы спанбонд, мельтблаун деп аталатын маталардан дайындалатын маскаларды пайдалану керек. Біздің үшқабатты маскалар осындай маталардан тігіледі және 92% сыртқы күштерден тыныс алу жолдарын қорғай алады», - дейді өнеркәсіп директоры.

Жақында өндіріс орны балаларға арналған бетперделер шығарады. Сонымен қатар бетперделерді кәдеге жарату жобасын дайындап жатыр. Өндіріс көлемін ұлғайту үшін FFP2/FFPP3/KN95 респираторларының қосымша желілерін жеткізуге келісімшарттар жасалды.

Хабар 24 телеарнасы