423,41 498,70 5.56
+7 (7172) 757 485 24kz@khabar.kz
ҚАЗ


Арыс тұрғындары салынған үйлердің сапасына шағымдарын айтты

  • 321
  • UPD: 22:04, 06.08.2020

Асығыс тірлік, сапасыз құрылыстан әбден шаршадық. Бұл Түркістан облысының Арыс қаласындағы Гарем шағын ауданы тұрғындарының жанайқайы. Жунжаев көшесінің тұрғындары «былтырғы жарылыстан кейін жауапты мердігерлер үйімізді толық бітірмеді, шала іс аяқсыз қалды» дейді.

Марина Геннадиевна 1-топ мүгедегі. Жумжаев көшесіндегі 16 үйде тұрады. Мұндағы баспаналардың барлығы 4 отбасылық. Былтыр жарылыс болған кезде үйлері қирап, жарамсыз болып қалған. Мемлекет ескі үйдің орынынан жаңасын салып беріпті. Арбаға таңылған әйел мердігер мекеменің жұмысты толық аяқтамағанын, көбі шала істелгенін айтады.

Марина Хамрук, Арыс қаласының тұрғыны:

- Мен мұндағы құрылыстың сапасыз жүргізілгенін айтқым келеді. Үйге орнатып берген пештері тартпайды. Жылу жүйесі де мардымсыз, қабырғалары сыз тартады. Еденнің жақтауларын қақпаған. Есік-терезелері дұрыс жабылмайды. Соны қайтадан дұрыстап берсе деген тілегіміз бар.

Ал осы көшеде тұратын Ольга Владимировна болса, «баспанамыздың құрылысында мін жоқ, бар гәп пеште болып тұр, дұрыс орнатпаған» дейді. 

Ольга Владимировна, Арыс қаласының тұрғыны:

- Үйімді жақсы салды. Оған рақмет айтамын. Бірақ пеш оңбады. Иіс ішке ұрады. Тағы да болса есік-тереземіз осы жерде орналасқан. Ашып желдетіп аламыз. Ал пеш іште болса не болар еді? Осыны жөндеп берсе дейміз.

Осы көшедегі 15-үйдің тұрғыны Өтеген Нұралбек те пешінің дұрыс жанбайтынын айтады. «Ауызғы үйдің ішін толық бітірмей кетті» деп мердігер мекемеге ренжулі.

Өтеген Нұрлыбек, Арыс қаласының тұрғыны:

- Мынау бітірмей кеткен жері. Қалғанына рақмет бітіріп берді. Осы бөлме бітпей қалды. Анау пеші жанбайды. Оны үйден қостық. Әкелген пеші тұр міне. Осы бөлмені бітіріп берсін, болды басқа ештеңе сұрамаймыз.

Осы көшенің тағы бір тұрғыны Зарина Георгиади «жаңа баспана салып бергені үшін мемлекетке алғыстан басқа айтарым жоқ. Егер өзім болсам бұндай үйді өмір бойы сала алмас едім, оған шамам да, қаржым да жетпейді. Бастысы бас аман, қалғаны орынына келеді» дейді. 

Зарина Георгиади, Арыс қаласының тұрғыны:

- Үйіміз жылы, таза, әрі жарық. Жаман деп айтуға аузым бармайды. Шынымды айтсам, бұрынғы үйіміз ескі болатын. Мынадай зәулім үй салып берген үкіметке рақмет. Осында жұмыс істеген мердігер мекеменің құрылысшылары да аянып қалмады. Барлығын ойымыздағыдай істеп берді. 

Бұл үйлердің барлығы 9 секторға қарайды. Оған Нұр-сұлтан қаласы жауапты. Мұнда 20-ға жуық әртүрлі мердігер компаня жұмыс істеген. Естеріңізде болса, былтыр осы сектордың жұмысы көп сынға алынған болатын. Құрылыс қар түскенге дейін жалғасты. Халықты тезірек үйлеріне кіргізу үшін асығыстыққа да жол берілген. Бірақ барлық кемшілікті жоямыз дейді мердігер мекеме өкілі.

Ернар Қожахметұлы, мердігер мекеменің өкілі:

- Үйді салғанда кейбір жерлерді қалып кетті, оны істеп береміз деп уәде бергенбіз. Біз биыл ерте келейік дегене едік, келе алмаған себебіміз, мынау карантинге байланысты келе алмай жатырмыз. Осы эпидахуал жақсарған соң қалған жұмытарды істеп беріп кетеміз. Былтыр қысқа асығыстау болдық, халықты көшеде қалдырмау керек болды. Үйлеріне кіргізу керек болды. Енді сол сыртта қалып кеткен жұмыстарды істеп беруге міндеттеніп отырмыз.

Ал Арыс қалалық құрылыс бөлімінің мамандары барлық кемшіліктер туралы жауапты мердігерлерге ескертілгенін айтады. Карантин мерзімі аяқталған соң олқылықтар орнына келеді деп отыр.

Бағдат Битілесов, Арыс қалалық құрылыс бөлімінің инспекторы:

- Қалып кеткен ақаулар шығып жатыр және ол бойынша мердігерлерге келісім-шартта көрсетілген 5 жылдық кепілдік мерзімдері бар екенін хабарладық. Ол мердігерлер қазіргі таңда карантинге байланысты сәл тоқтап тұр. Олар барлығын қалпына келтіріп беретінін айтып отыр.

Айта кетейік, Арыс қаласында 8 мыңнан аса үй бар. Былтырғы жарылыс кезінде соның 7 мыңнан астамы зақымданып, қалпына келтірілді. 400-ден аса баспана қайта салынды. Мұндағы құрылыс алаңында 500-ден астам компания, 10 мыңға жуық құрылысшы жұмыс істеді.

Авторлары: Жандос Жұмабек, Ерболатұлы Әбіш

Хабар 24 телеарнасы