424,85 498,70 5.58
+7 (7172) 757 485 24kz@khabar.kz
ҚАЗ


Биыл Қазақстанда 18 млн тонна астық жинау жоспарланған

  • 195
  • UPD: 11:10, 25.08.2020
Биыл Қазақстанда 18 млн тонна астық жинау жоспарланған

ҚР премьер-министрі Асқар Маминнің төрағалығымен өткен Үкіметтің селекторлық отырысында 2020 жылғы егін жинау жұмыстарының барысы қаралды.

Қазіргі уақытта барлық өңір жаппай егін жинауға кірісті, деп хабарлады primeminister.kz.

Биыл 22,7 млн га жерге егін егілген, бұл 2019 жылғы деңгейден 439 мың га жерге артық. Дәнді дақылдар 15,9 млн га (оның ішінде бидай – 12,1 млн га), майлы дақылдар 2,9 млн га, мақта 125,8 мың га, қант қызылшасы 20,9 мың га, көкөніс-бақша өнімдері және картоп 457,4 мың га, жемшөп дақылдары 3,3 млн га алқапқа егілді.

Егін жинау жұмыстарын жүргізу үшін арзандатылған дизель отынының қажетті көлемі – 395 мың тонна (ауыл шаруашылығы тауарын өндірушілер үшін орташа баға – шамамен 147 теңге/литр). Республикада 145 мың трактор, 75 мың трактор тіркемесі, 38 мың астық жинау комбайны, 15 мың дестелегіш, 39 мың жүк автомобилі бар. Агроөнеркәсіптік кешен субъектілерін қолдау үшін «Аграрлық несие корпорациясы» АҚ республикалық бюджеттен 70 млрд теңге көлемінде бюджеттік несие бөлді, олар 3,4 млн га егіс алқаптарын қамти отырып, толығымен АӨК-тің 2400 субъектісіне берілді.

«Үкімет тарапынан егін жинау жұмыстарын қаржылай және материалдық-техникалық қамтамасыз ету үшін барлық қажетті шешімдер қабылданды. Жалпы алғанда, қабылданған шаралардың есебінен осы жылы астықтың болжамды жалпы жиналымы 18 млн тонна деңгейінде (2019 жылға қарағанда 3,4% өсім) жоспарланып отыр. Қазақстан өзін астықпен толық қамтамасыз етеді. Экспорт әлеуеті де жақсы болады», – деді А.Мамин. 

Үкімет басшысы астық жинауды сапалы әрі уақтылы жүргізу, ауыл шаруашылығы тауарын өндірушілерді жанар-жағармай материалдарымен қамтамасыз ету, сонымен қатар жиналған өнімді уақытылы қабылдау және тиісті сақтау жағдайларын ерекше бақылау бойынша барлық қажетті шараларды қабылдауды тапсырды.

Хабар 24 телеарнасы