423,91 504.32 5.82
+7 (7172) 757 485 24kz@khabar.kz

Елімізде омыртқа жарығы дертімен ауыратын мыңнан астам бала бар

  • 331
  • UPD: 21:57, 01.12.2020

Арқа омыртқасы жарығы немесе «Спина Бифида». Елімізде осы жұмбақ дертке шалдыққан мыңнан аса бала бар.

Дәрігерлердің айтуынша, көп жағдайда оларды толықтай емдеу қиын. Сондықтан ең болмағанда медициналық көмек үзілмеуі керек дейді. Бүгін №2 қалалық көп бейінді балалар ауруханасы ашық есік күні өткізді. 

Бір ғана елорданың өзінде арқа омыртқасы жарығымен туылған 46 бала бар. Бүгін олардың бірқатары №2 қалалық көп бейінді балалар ауруханасына жиналды. Бұл жерде балдырғандарға тәттілер таратылып, мерекелік көңіл-күй сыйланды. Іс-шараның маңызын бауыр еті баласы ауыр дертке шалдыққан ата-аналар жақсы біледі. 

Айгүл Бектаева, қала тұрғыны:

- Біздің балаларымызға жасап жатқан акциясы керемет. Ол бізге әр 6 ай сайын керек деп ойлаймын. Балалардың дамуына үлкен үлес қосып отыратын осы біздің дәрігерлер. Балалардың онсыз оңалуы өте қиын. 

Акция аясында елорданың кішкентай тұрғындарын нейрохирург, ортопед, уролог мамандары тегін қарады. Ал кешенді тексерісті қажет еткендеріне стационарлық жағдайда емделу ұсынылды. 

Серік Қизатуллин, №2 қалалық балалар ауруханасының бөлім меңгерушісі: 

- Қазақстанда мыңнан аса бала арқа омыртқасы жарығымен дүниеге келген. Дерттен айығу мәселесі жұлынның қаншалықты зақымдалғанына байланысты. Көп жағдайда, одан құлан-таза жазылу қиын. Себебі бұл дерт толық зерттелмеген. Бірақ ем-дом шаралары оң нәтижесі көрсеткен кездер де бар. Біз, дәрігерлер оларды қатарға қосу үшін қолдан келген көмекті беруге дайынбыз.  

Жалпы медицинада «Спина Бифида» деп аталатын бұл сырқаттың емі жоқтың қасы. Сондықтан науқас өмір бойы медициналық көмекке зәру.

«Бұдан бөлек оңалту шараларын да үзбеген абзал. Бұл олардың қоғамға барынша бейімделуі үшін керек» дейді дәрігерлер. 

Авторлар: Назерке Тоқжан, Аян Сәрсенбаев

Хабар 24 телеарнасы