426,99 518.00 5.93
+7 (7172) 757 485 24kz@khabar.kz
ҚАЗ

Елімізде көз іші қатерлі ісігіне шалдыққан балаларға арнайы операция жасалатын болды

  • 223
  • UPD: 09:11, 05.01.2021

«Хабар 24» тілшілері бұл тақырыпты осыдан 2 айдай уақыт бұрын көтерген еді.

Ақыры министрлік ретинобластома диагнозы қойылған балаларға селективті химиотерапия жасайтын болып шешті. Қазір олар тарифтерді бекітіп жатыр. Ізін ала квота арқылы науқастарды тегін емдеуге кіріседі.

Әлихан қазір 4 жаста. Ес білгелі осы. Аурухана жағалаумен келеді. Дәрігерлер балпанақтай баланың көзін тұрақты түрде тексеріп отырады. Кезінде жанарын аман сақтап қалуға да болар еді. Тек ата-анасы қажет қаражатты жинап үлгермеген. Сөйтіп, баланың бір көзін ойып алып тастауға тура келді.   

Қазір Әлихан протезбен жүреді. Бұғанасы әлі беки қоймаған бала үшін бұл – ауыр соққы. Енді оның көзін ешкім қайтарып бере алмайды. Қазір елде осындай ауруға шалдыққан 300-ге жуық бүлдіршін бар. Жыл сайын кемі 15 балаға ретинобластома диагнозы қойылады. Емдеудің жалғыз жолы – селективті химиотерапия. Біздің елде ондай операция жасамайды. Тек шетелде. Ал ондағы баға аспандап тұр.

Алуа Әубәкірова, қазақ көз аурулары ғылыми-зерттеу институтының бөлім меңгерушісі:

- Ресейде бір продецураға шамамен 500 мың рубль кетеді. Ал Швейцария бір емге 60-70 мың доллар сұрап жатыр.

Ресейлік мамандар осыдан 2 жыл бұрын біздің елге келіп, 4 балаға операция жасап кеткен. Қазір сол бүлдіршіндер шапқылап жүр. Нәтижесін көрген соң, селективті химиотерапияны біздің елде де жасайтын болып шешіпті. Тіпті министрлік клиникалық хаттамаға енгізген. Бірақ 2 жылдан бері сол мәселе сиырқұйымшақтанып келеді. Нақты шешім қабылдауға ешкім асықпай отыр. Бертінде ғана белгілі болды. Биылғы жылдан бастап көп күттірген операция ақыры өз елімізде жасалатын болыпты.

Риза Боранбаева, педиатрия және балалар хирургиясы ғылыми орталығының басқарма төрағасы:

- Биылғы жылдан бастап біз бұл терапияны өз елімізде жасайтын боламыз. Қазір министрлік тарифтерді бекітіп жатыр. Содан кейін ресейлік мамандар келіп, тағы бір шеберлік дәрісін өткізеді. Ізінше, бірден селективті химиотерапия жасауға кірісіп кетеміз.

Думан Базарбеков бұл мәселені біраз уақыттан бері көтеріп келген. Тіпті министрлікке хат жазып, Президент әкімшілігіне жүгінген. Ақыры дегендеріне жетті. Заңгер көз іші қатерлі ісігіне шалдыққан балаларға дер кезінде көмектеспесе, ауру асқынып, балалардың өліп кетуі бек мүмкін екенін айтады. Сондықтан мемлекеттің бұл проблемаға ден қойғаны құптарлық іс дейді.

Думан Базарбеков, заңгер:

- Мемлекет тарапынан көмек болатыны қуантып отыр. Қаншама бала көзін, тіпті өмірін сақтап қалуға мүмкіндік алады. Әйтпесе, шет мемлекеттерде мұндай операциялар тым қымбат. Ол үшін миллиондаған ақша керек. Ондай қаражат барлық отбасында жоқ. Бүгінгі күні мемлекеттің ата-аналардың өтінішіне құлақ асқаны дұрыс болды. Шыны керек, бұл проблема көптен бері көтеріліп келе жатқан. Талай хаттар жазылды.

Мемлекет көз іші қатерлі ісігін тегін емдемек. Ол үшін науқас балаларға квота бөлінеді. Операцияны көктемнің соңына қарай жасауға кіріседі. Ал әзірге ретинобластомамен ауыратын балаларға жалпы химиотерапия қабылдай тұруға тура келеді.

Дастан Сейілханұлы

Хабар 24 телеарнасы