420,31 511.30 5.69
+7 (7172) 757 485 24kz@khabar.kz
ҚАЗ

Н.Нығматулин: Мемлекет басшысының мақаласы әрбір қазақстандықтың рухын асқақтатуға серпін береді

  • 110
  • UPD: 17:05, 05.01.2021
Н.Нығматулин: Мемлекет басшысының мақаласы әрбір қазақстандықтың рухын асқақтатуға серпін береді

Мәжіліс төрағасы Нұрлан Нығматулин Мемлекет басшысы Қасым-Жомарт Тоқаевтың «Тәуелсіздік бәрінен қымбат» атты мақаласына өз пікірін білдірді.

Нұрлан Нығматулин атап өткендей, 2021 жыл біз үшін ерекше, себебі осы жылы біз ата-бабаларымыз ғасырлар бойы аңсаған, қасиетті тәуелсіздігіміздің 30 жылдығына қадам бастық, деп хабарлады Мәжілістің баспасөз қызметі.

Мәжіліс төрағасының айтуынша, мақалада мемлекетіміздің қалыптасу, даму, өркендеу жолы «Бағдар мен белес», «Таным мен тағлым», «Қоғам мен құндылық» және «Ұлағат пен ұстаным» деп аталатын төрт ауқымды бағытты қамти отырып, «Отыз жылда біз қандай жетістіктерге жеттік?», «Келер ұрпаққа қандай елді аманаттаймыз?», «Мемлекеттігімізді нығайта түсу үшін тағы не істейміз?» деген сұрақтардың айқын жауабын көрсеткен. 

Мәжіліс төрағасы алғашқы онжылдықта Нұрсұлтан Назарбаевтың басшылығымен мемлекеттік нышандарымыз белгіленіп, билік жүйеміз қалыптасқанын, «Қазақстан -2030» стратегиясын қабылдағанымызды, екінші онжылдықта мемлекетіміздің тұғыры нығайып, экономикалық әлеуетіміз артқанын, үшінші онжылдықта «Қазақстан – 2050» стратегиясын қабылдап, озық дамыған отыз елдің қатарына қосылуды жоспарлап отырғанына тоқталды.

«Осы кезеңдерде білім, денсаулық, әлеуметтік жағдай, рухани байлығымыз, патриоттық рухымыз, басқа да еліміздің барлық салалары заман талабына сай қарқынды өсіп отырды. Бұл – Елбасымыз бастап, Мемлекет басшысы жалғастырған мақсаты берік, болашағы айқын, сенімі нық қазақстандық үздіксіз даму жолымыз», - деді Н.Нығматулин.

Енді алдағы төртінші онжылдықтағы басты міндет қуатты ел және кемел халық болу екенін алға тартқан Палата спикері осы жолда ең басты бағдар білімді ұрпақ екенін айтып, жас буынға жан-жақты қолдау көрсете отырып, бәсекелік қабілетін арттыруға баса көңіл бөлінетінін жеткізді.

«Мемлекет басшысының мақаласы елім, жерім дейтін, тәуелсіздікті қорғауға, сақтауға үлес қосуға тиіс әрбір азамат үшін айқын бағдар деуге болады. Сонымен бірге, бүкіл қоғамды ұйыстыратын құндылықтарды жинақтай отырып, ел бірлігін, ұлт тұтастығын, мемлекет өркениетін қамтамасыз етуге арналған нақты тарихи құжат», - деді Нұрлан Нығматулин.

Мәжіліс төрағасы атап өткендей, Мемлекет басшысының мақаласы әрбір қазақстандықтың жүрегінен орын алып, рухын асқақтатуға серпін беретіні сөзсіз.

Хабар 24 телеарнасы