414,77 504.70 5.64
+7 (7172) 757 485 24kz@khabar.kz
ҚАЗ

Қазалы ауданының тұрғындары судан тапшылық көріп отыр

  • 140
  • UPD: 18:17, 08.02.2021

Қызылорда облысы Қазалы ауданының тұрғындары тіршілік нәрінен қысылады.

Күз-қыс мезгілінде 5-6 мың текше метр су тұтынатын қазалылықтардың қазіргі сұранысы 10 мыңға дейін жеткен. Шаруалар бау-бақша, егістігін суаруды бастаған кезде Арал – Сарбұлақ топтық су құбырында қысым азайып, тапшылық туындайды. Мәселе қалай шешімін табады?

Әйтеке би кентін толық ауыз сумен қамтуға қауқарлы Байқожа су құбырын жаңғырту үшін қыруар қаржы керек. Ал қаржыландыру үшін магистральдық желі су ресурстары комитетінің теңгеріміне өтуі тиіс екен. Егер жоба мақұлданса, аудан орталығына дейін 62 шақырым құбыр тартылады.

Мұрат Әбсұлтанов, Қазалы аудандық ТШК бөлімінің басшысы:

- Байқожа локальді су құбырын қайта жаңғырту жобасы бойынша облыстық бюджеттен бөлініп, жоба-сметалық құжаты әзірленіп, мемлекеттік сараптама қорытындысы алынды. Жоба құны 2 млрд 500 млн теңгеге қаржы шықты. Аталған жобаны республикалық бюджеттен қаржыландыруға тиісті комитеттерге 2021 жылға қаржыландыруға ұсыныс берілді.

Қазалы ауданы бойынша сервистік жүйеге қосылмаған 3 ауыл еді. Жуырда ғана Бекарыстан би елді мекенінің әр үйіне су кіргізілді. Қыстың көзі қырауда қатып қалған құдықтың мұзын ойып, жібітіп, шелекпен су тасыған Жадыра Өтемісова үшін енді ол бейнетті күндер артта қалды.

Жадыра Өтемісова, Бекарыстан би ауылының тұрғыны:

- Балаларға, үлкендерге өте жақсы болып тұр судың аққаны. Өте тиімді, ел қуанышқа бөленіп жатыр. Бұл міне, Қазақстанның өркендеп жатқанының бір көрінісі. Кереметтей жылы суымызды үйімізге қосып алдық.

Қазалыда құдықтан су ішіп отырған әлі екі ауыл бар. Шәкен мен Сарбұлақ ауылдарын топтық су құбырына қосу экономикалық жағынан тиімсіз екен. Енді ұңғыма қазу жобасы қарастырылып жатыр.

Мұрат Ергешбаев, Қазалы ауданының әкімі:

- Энергетика басқармасымен келісіп, жерасты суын пайдалану мәселесін қарастырып жатырмыз. Қазір зерттеу жұмыстары жүріп жатыр. Ең тиімді, тез шешілетін мәселе сол екі ауылдық округінің жерасты суын пайдалану. Тазалатып, халыққа сервистік желісін тартып беру жұмыстары болып тұр.

Ағымдағы жылы Жанқожа батыр мен Майдакөл ауылының үйлері сервистік желіге қосылады. Сол кезде ауданды ауыз сумен қамту көрсеткіші 90%-тен асады деп күтілуде.

Авторлары: Қамбар Бекенов, Қанат Еңсебаев, Айтмұхамбет Бәйділдаев

Хабар 24 телеарнасы