419,41 505.95 5.69
+7 (7172) 757 485 24kz@khabar.kz
ҚАЗ

Жамбыл облысында 600 мыңға жуық тұрғынды вакциналау жоспарланған

  • 88
  • UPD: 17:11, 19.02.2021
Жамбыл облысында 600 мыңға жуық тұрғынды вакциналау жоспарланған

Жамбыл облысында коронавируспен күрес шараларына 5 миллиард теңгеден астам қаржы бөлінді.

Аймақ басшысы Бердібек Сапарбаев халыққа есеп беру кездесуінде қаралған бюджет қаражаты қайда бағытталғанын айтып берді.

Қаржылық қолдаудың арқасында денсаулық сақтау саласының материалдық-техникалық базасын едәуір жақсартуға мүмкіндік туды. Атап айтсақ, 208 дана қажетті медициналық жабдық сатып алынды. Нәтижесінде медициналық мекемелердің техникамен және бұйымдармен жабдықталу деңгейі 15 процентке артып, 85,9 процентті құрады.

Мемлекет басшысы Қасым-Жомарт Тоқаевтың тапсырмасына сәйкес 8 мобильді емхана сатып алынды, бұл дәрігерлердің науқастарға келуін жеделдетуге, ауылдық жерлердегі медициналық көмектің сапасын жақсартуға мүмкіндік беруде.

Коронавируспен күреске тартылған 4 мыңға жуық медициналық қызметкерге жалпы сомасы 3,4 миллиард теңгеге үстемақы төленді.

4,5 мың орынға арналған төсек қоры дайындалды. Тараз қаласындағы қалалық перинаталдық орталық пен Т.Рысқұлов ауданындағы өкпе аурулары диспансері инфекциялық аурухана болып қайта жасақталды.

Тұрақтандыру қоры 730 миллион теңгеге дәрі-дәрмектер мен медициналық мақсаттағы бұйымдардың екі айлық резервін қалыптастырды.

«Өткен жылы Таразда коронавирустық инфекциямен ауырған науқастарға арналған 120 төсекті еліміздегі алғашқы оңалту орталығы ашылды. Бүгінгі күнге дейін онда 750-ге жуық адам оңалту курсынан өтті десек, оның ішінде жүзге жуық медициналық қызметкері бар», - деп атап өтті облыс әкімі.

Коронавирусқа қарсы ұжымдық иммунитетті қалыптастыру үшін вакцинациямен облыстың 18 жастан 64 жасқа дейінгі 600 мыңға жуық тұрғынын қамту көзделуде.

«Жақын арада Қордай, Талас және Т.Рысқұлов аудандары КТ-аппараттарымен қамтамасыз етіледі, биыл 200 төсекті онкологиялық диспансердің құрылысын аяқтау, облыс орталығында «Мейірім» медициналық орталығының, облыстық көпбейінді аурухананың, Байзақ ауданында емхананың және Қордай аудандық орталық аурухананың құрылысын бастау жоспарлануда», - деп хабарлады Бердібек Сапарбаев.

Ақпарат көзі: Жамбыл облысы әкімінің баспасөз қызметі

 

Хабар 24 телеарнасы