432,26 519.25 5.62
+7 (7172) 757 485 24kz@khabar.kz
ҚАЗ

Түркістан облысында жоғалған үш жасар бала табылды

  • 114
  • UPD: 11:46, 03.03.2021
Түркістан облысында жоғалған үш жасар бала табылды

Сарыағашта ювеналды полиция қызметкерлері жоғалған үш жасар бүлдіршінді үйіне қайтарды, деп хабарлады Polisia.kz.

Сарыағаш АПБ кезекші бөлімінің «102» пультіне күндізгі уақытта кішкентай баланың жоғалып кеткені туралы хабарлама келіп түсті. Баланың ата-анасы олардың үш жасар ұлы аулада скутермен ойнап жүріп, содан кейін белгісіз бағытта жоғалып кеткенін айтты. Оқиға орнына Сарыағаш АПБ жергілікті полиция қызметінің қызметкерлері дереу жетіп, жоғалған бүлдіршінді іздестіруге кірісті.

Сарыағаш ауданының ювеналды полиция инспекторлары Нұржан Хусаинов пен Гүлмира Сарыбаева жақын маңдағы барлық көшелерді, аулаларды мұқият аралап, жалғыз жүрген баланы көруі мүмкін деген куәгерлер мен жолаушылардан сұрастырды. Оған қоса бейнебақылау камераларын тексерді.

Осылайша, екі сағат ішінде тәртіп сақшылары үйден екі шақырым жердегі аудан орталығының қиылыстарының бірінен жоғалған бүлдіршінді тапты. Табылған баланы тәртіп сақшылары аман-есен үйіне жеткізіп, анасына тапсырды.

Өз кезегінде Сарыағаш қаласының тұрғыны ювеналды полиция инспекторлары Н. Хусаинов пен Г.Сарыбаеваға және Сарыағаш АПБ-нің барлық жеке құрамына кішкентай ұлын тауып бергені үшін алғысын айтты.

«Түстен кейін мен аулада ойнап жүрген үлкен ұлымды таппай қалдым. Содан соң бірден полицияның көмегіне жүгіндім. Өз кезегінде тәртіп сақшылары менің ұлымды тауып берді. Сондықтан Сарыағаш ауданының полицейлеріне алғысымды білдіргім келеді. Оларға денсаулық пен қызметте табыс тілеймін. Қазір балам менің қасымда. Көп рақмет», – деді жергілікті тұрғын.

Хабар 24 телеарнасы