432,01 515.14 5.62
+7 (7172) 757 485 24kz@khabar.kz
ҚАЗ

Батыс Сахарада БҰҰ миссиясын атқарушы Қазақстан әскерилерінің құрамы ауысты

  • 154
  • UPD: 22:53, 27.03.2021
Батыс Сахарада БҰҰ миссиясын атқарушы Қазақстан әскерилерінің құрамы ауысты

Біріккен Ұлттар Ұйымының Батыс Сахарада референдум өткізу жөніндегі миссиясын атқарып жүрген қазақстандық офицерлер алмасты. Жаңа құрамда үш офицер – подполковниктер Уәлихан Байкенов пен Сәбина Мұрзалинова, сондай-ақ капитан Дәурен Садуақасов бар, деп хабарлайды ҚР ҚМ баспасөз қызметі.

Олар бір жыл бітімгерлік миссияны орындаған подполковник Арман Омаров және Ернар Аманиязов, сондай-ақ капитан Римма Шәкееваның орнына барды. Аталған миссияға дайындық кезінде офицерлер оның ерекшеліктері мен міндеттерін, сондай-ақ тұтастай сол елдегі жағдайды бір айдан астам уақыт зерделеді. Енді олар 30-дан астам мемлекеттің өкілдерімен бірге қызмет етпек.

Бітімгерліктен қайтқан офицерлер өздерін жауапты және жоғары білікті мамандар ретінде көрсетті.

Атап айтқанда, подполковник Арман Омаров ұшу қауіпсіздігі техникасы мен оларды үйлестіруге жауапты болды. Дағдарыс жағдайында көрсеткен бастамасы мен кәсібилігі үшін офицер миссия қолбасшысының атынан алғыс хатпен марапатталды. Подполковник Ернар Аманиязов соңғы жеті ай ішінде миссия қолбасшысының логистика жөніндегі аға әскери кеңесшісі міндетін атқарды. Ол материалдық-техникалық қамтамасыз етуді жоспарлауға бірнеше рет қатысты. Қиын жағдайлар туындағанда өз ұсыныстарын айтып, нәтижесінде команда оларды негізді, әрі дұрыс ұсыныс деп қабылдады.

Капитан Римма Шәкеева әскери қызметші әйелдердің бітімгерлік қызметінің барлық салаларында, қиын жағдайларда өздерінің ер әріптестерімен бірдей деңгейде қызмет атқара алатынын кезекті рет дәлелдеді. Шәкеева миссиядағы қызметін бітімгерлік базасының операторы ретінде бастады. Патрульдерді жоспарлауға жауапты болды. Содан кейін миссия штабы жанындағы бөлімде жұмыс істеді, онда келген бітімгер офицерлерді даярлауда кәсіби дәрежесін көрсетті. Қазіргі сәтте Батыс Сахарада Қазақстан Қарулы Күштерінің әскери бақылаушылары қызметінде қазақстандық бес офицер бар. Бітімгерлік операцияларға олар қарусыз қатысады және қақтығысушы тараптардың ешқайсысын қолдамай, бейтарап қағиданы ұстанады.

Хабар 24 телеарнасы