Шымкентте эпидемиологиялық ахуал тұрақсыз күйінде қалып отыр. Соңғы тәуліктің өзінде 48 адамнан коронавирус анықталған. Осыған байланысты өткен жылғы қателікті қайталамас үшін қала әкімі Мұрат Әйтенов дәрі-дәрмекпен қамтуды қатаң бақылауға алатынын жеткізді.
Қауіпті індетпен күреске биыл 659 млн теңге бөлінбек. Өткен жылы бұл сома 180 млн теңгені құраған еді. Бұл шаралар арқылы дәріханадағы препараттар бағасын 15-30 процентке дейін төмендету көзделіп отыр. Қазір шаһардағы дәріханалар мен емханаларда 4 млн 144 мың дана дәрі-дәрмек бар. Мұның ішінде вирусқа қарсы қолданылатын дәрілердің бағалары 25 теңгеден басталатын көрінеді. Сонымен қатар 2 миллион медициналық бетперде және бір миллион қолғап дайындалыпты.