Түркістан облысының полицейлері бірнеше көкпар ойынын тоқтатты, деп хабарлады Polisia.kz.
Түркістан облысы Бас мемлекеттік санитариялық дәрігерінің қаулыларының негізінде бірқатар шектеу шарасы қойылған. Осы бағытта Ордабасы АПБ-ның полицейлері карантин режимін және шектеу шараларын сақтау үшін құрылған топпен бірге профилактикалық жұмыстарды тұрақты түрде жүргізуде.
Осындай кезекті рейдтік шара барысында күндізгі 15:30 шамасында Сарыағаш ауданы ауылдарының бірінде көкпар ойыны өтіп жатқаны анықталған. Ұйымдастырылған көкпар ойыны тоқтатылып, 200-ден астам адам таратылды.
Сондай-ақ Отырар ауданында жасырын түрде көкпар ойыны ұйымдастырылған. Аталған жиынға 150-ден астам адам жиналған, тәртіп сақшылары көкпарды тоқтатты.
Осыған орай карантин режимін және шектеу шараларын сақтамаған тұрғындарға қатысты іс-құжаттар жинақталып, заңды шешім қабылдау үшін ҚР ҚК-нің 425-бабы (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) бойынша жинақталған құжаттар аудандық СЭББ-на жолданды.