427,15 517.06 5.74
+7 (7172) 757 485 24kz@khabar.kz
ҚАЗ

Нұр-Сұлтанға бағыт алған ұшақ мас жолаушының кесірінен Таразға қайта оралды

  • 128
  • UPD: 17:20, 09.04.2021
Нұр-Сұлтанға бағыт алған ұшақ мас жолаушының кесірінен Таразға қайта оралды

8 сәуірде сағат 15:30-да Тараз – Нұр-Сұлтан бағытындағы ұшақ Тараздан ұшып шығып, бір сағаттан кейін әуе бортында деструктивті жолаушының болуына байланысты әуежайға кері оралды.

Қайта қонған соң құқықбұзушы әуе кемесі командирінің актісімен Тараз қаласының әуежайындағы Желілік полиция бөлімшесінің қызметкерлеріне табысталды. Бұдан соң ұшақ межелі жеріне ұшып кетті.

Тексеру барысында көлік полицейлері 56 жастағы Жамбыл облысының тұрғынын анықтады. Ол ұшақ бортында масаң күйде болып, өзін дөрекі ұстап, қоғамдық орында балағат сөздер айтып, экипаж бен әуе кемесі командирінің бірнеше рет ескерткен талаптарына бағынбаған.

Медициналық куәландыру қорытындысына сәйкес ер адамның орташа дәрежедегі алкогольдік масаң күйде болғандығы анықталды.

Оған қатысты ҚР ӘҚБтК-нің 434-бабының 1-бөлігімен, яғни ұсақ бұзақылық, ҚР ӘҚБтК-нің 440-бабының 1-бөлігімен, яғни алкогольдік ішімдіктер ішу және қоғамдық орындарда масаң күйде болу және ҚР ӘҚБтК-нің 566-бабының 1-бөлігімен, яғни әуе кемесінде мінез-құлық қағидаларын бұзу бойынша бірден үш әкімшілік хаттама толтырылып, 13 АЕК мөлшерінде айыппұл салынды.

Сондай-ақ аталған әуе рейсінің 1968 жылы туған әйел-жолаушысына да қатысты ҚР ӘҚБтК-нің 434-бабының 1-бөлігімен, яғни ұсақ бұзақылық және ҚР ӘҚБтК-нің 566-бабының 1-бөлігімен, яғни әуе кемесінде мінез-құлық қағидаларын бұзу бойынша әкімшілік хаттамалар толтырылып, оған 3 АЕК мөлшерінде айыппұл салынды.

Ұсақ бұзақылық бойынша жасалған материалдар тиісті шешім қабылдау үшін Тараз қаласының мамандандырылған ауданаралық әкімшілік сотына жолданды.

Жыл басынан бері әуе және теміржол нысандарында түрлі құқықбұзушылықтар үшін 14 мыңнан аса азамат әкімшілік жауапкершілікке тартылды, оның ішінде алкогольді ішімдіктер ішкені және қоғамдық орындарға масаң күйде келгені – 1391 тұлға, ұсақ бұзақылық үшін – 179.

Ақпарат көзі: Көліктегі полиция департаментінің баспасөз қызметі

Хабар 24 телеарнасы