429,33 519.25 5.73
+7 (7172) 757 485 24kz@khabar.kz
ҚАЗ

«Аңсаған сәби» бағдарламасы: елордада 276 квота бойынша пациенттер ана болуға дайындалуда

  • 106
  • UPD: 17:23, 19.04.2021
«Аңсаған сәби» бағдарламасы: елордада 276 квота бойынша пациенттер ана болуға дайындалуда

Елордада «Аңсаған сәби» бағдарламасы аясында биыл бөлінген 486 квотаның 276-сы бойынша пациенттер ана болуға дайындалуда.

«Әлеуметтік медициналық сақтандыру қоры ЭКҰ бағдарламасын 2018 жылдан бері қаржыландырып келеді, 2018 жылы ТМККК шеңберінде 902 цикл, 2019 жылы да осы көлемде қаржыландырылды. Өткен жылы 1105 ЭКҰ қызметі көрсетілді.

Биыл жасанды ұрықтандыру шараларын жасауға бөлінетін квота саны 2020 жылмен салыстырғанда 7 есе өсті. 2021 жылы Медициналық сақтандыру қоры алдын ала 6,2 млрд теңге сомасына 7000 экстракорпоральды ұрықтандыру циклын қаржыландыруды жоспарлаған болатын. Биылғы жылы елордаға 486 квота бөлінді», – деп хабарлады «Әлеуметтік медициналық сақтандыру қоры» КЕАҚ Нұр-Сұлтан қаласы бойынша филиалының баспасөз қызметі.

Естеріңізге сала кетейік, 2021 жылдан Президент Қасым-Жомарт Тоқаевтың тапсырмасымен Қазақстанда «Аңсаған сәби» әлеуметтік бағдарламасы басталды. Бағдарламаның мақсаты – қосалқы репродуктивті технологиялардың (ҚРТ) көмегімен отбасылық-демографиялық проблемаларды шешуге жәрдемдесу. Себебі, бала сүйе алмау – медициналық қана емес, әлеуметтік мәселе, отбасылық мәселе.

ДДСҰ мәліметтері бойынша, репродуктивті технологияны қолдану арқылы жүргізілген шаралар нәтижесінде 45-60% жағдайда әйелдер бала көтереді. Біздің елімізде ЭКҰ жүргізу тиімділігі орта есеппен 15%-тен 42%-ке дейін өсті. Бала туу (take baby home) фактісі бойынша емдеу тиімділігінің көрсеткіші 30% деңгейінде, бұл еуропалық ең жақсы деген клиникалардың көрсеткішіне сәйкес келеді.

Қазақстанда ЭКҰ бағдарламасына 2021 жылы бөлінген квота саны 7000-ға дейін көбейді. Бұл квота беру көрсеткіштерін кеңейтуге, оларды алу кезегінің азаюына мүмкіндік береді. Бүгінде елімізде 11030 әйел бедеулікпен есепте тұр.

«Нұр-Сұлтан қаласында бедеулік бойынша есепте тұрғандар саны – 1331. Біздің әйел денсаулығы бөлімшесі Нұр-Сұлтан қаласы бойынша ҚРТ көрсету ЭКҰ-ға дайындау жөніндегі үйлестіру орталығы болып табылады. Биылғы жылы елордаға 486 квота бөлінді. Қазіргі уақытта 276 квота беріліп, пациенттер дайындалуда. Осы жылы бастапқы медициналық-санитарлық көмек көрсету ұйымдары бұрын есепке тұрмаған және жеке медицина орталықтарына қаралған бедеулік көрсеткіштері бар пациенттерді анықтап, белсенді жұмыс жүргізуде», - дейді Нұр-Сұлтан қаласындағы №2 қалалық көпбейінді аурухана директорының амбулаториялық қызмет жөніндегі орынбасары Сәуле Жамантайқызы Ибраева.

ЭКҰ үшін кімдер өтініш бере алады?

Бұл емшара терапиялық жолмен емдеу нәтиже бермейтін бедеулік диагнозы қойылған пациенттерге арналған. ЭКҰ-ға отбасылық жұптар да, жеке адам да қатыса алады. Міндетті түрде үміткердің ерікті жазбаша келісімі болуы керек. Сондай-ақ Қазақстан азаматы болуы және Денсаулық сақтау министрлігі белгілеген медициналық параметрлерге репродуктивті жасы (18-ден 42 жасқа дейін), қалыпты соматикалық және эндокриндік мәртебелері, жеткілікті овариалды резерві сәйкес келуі қажет.

Жатырдың туа біткен немесе жүре біткен ауытқулары, соматикалық және психикалық бұзылулар, аналық без ісіктері, жедел қабыну және кез келген локализация онкологиясы болған жағдайларда ғана мамандар науқасты экстракорпоральды ұрықтандырудан бас тартуы мүмкін.

ЭКҰ-ға жолдама алу үшін не істеу керек?

ЭКҰ-ға жолдама алу үшін алдымен тіркелген жері бойынша емханаға бару қажет. Ұйым мамандары пациентті бедеулігі бар диспансерлік пациенттердің электрондық тіркеліміне қосады және бірқатар тексерулер тағайындайды. 12 ай ішінде бастапқы медициналық-санитарлық көмек көрсету ұйымы, яғни емхана бейінді маманның қорытындысы негізінде пациенттің құжаттарын жоғары технологиялық медициналық қызметтер жөніндегі жергілікті комиссияға жібереді. Оң шешім қабылданған жағдайда, әйелді «Емдеуге жатқызу бюросы» порталына тіркеп, емшараға дайындай бастайды. Пациент экстракорпоралды ұрықтандыру үшін клиниканы өз бетінше таңдауға құқылы.

МӘМС бойынша ЭКҰ процедурасынан жылына бір рет тегін өтуге болады. МӘМС жүйесінде ЭКҰ емшарасын жасар алдында ерлі-зайыптыларды тексеру тізбеге сәйкес жүзеге асырылады. МӘМС жүйесінде ЭКҰ циклдің базалық бағдарламасы қарастырылған.

ЭКҰ жүргізу қағидалары және ілеспе іс-шаралар туралы толық ақпарат Қазақстан Республикасы Денсаулық сақтау министрінің 2020 жылғы 15 желтоқсандағы № ҚР ДСМ-272/2020 «Қосалқы репродуктивтік әдістер мен технологияларды жүргізу қағидалары мен шарттарын бекіту туралы» бұйрығында жарияланған.

Ақпарат көзі: «Әлеуметтік медициналалық сақтандыру қоры» КЕАҚ Нұр-Сұлтан қаласы бойынша филиалының баспасөз қызметі

Хабар 24 телеарнасы