Орал қаласында сауда орталығында коронавируска қарсы екпе салу пункті ашылды, деп хабарлайды «Хабар 24».
Енді саудагерлер мен тұтынушылар кез келген уақытта сол жерден вакцина ала алады. Алғашқы күннен-ақ препаратты қабылдауға келгендердің қарасы аз емес. Дәрігерлер ресейлік «Спутник V» және арабиялық «Науаt-Vax» вакциналарын қолданып жатыр. Тұрғындар қай дозаны қабылдайтынын өзі таңдайды. Облысқа ақпан айынан бері қауіпті індетке қарсы 100 мыңнан астам вакцина жеткізілген. 60 мыңға жуық адам дозаның І компонентін салдырды. Осы айда Біріккен Араб әмірлігінен 17 500 дана «Науаt-Vax» вакцинасы алынған.
Оксана Чабан, дәрігер:
– Түске дейін «Спутник V» вакцинасын 16 адам, ал «Науаt-Vax» вакцинасын бір адам қабылдады. Келген тұрғындардың денсаулығын тексеріп жатырмыз. Әзірге шағым білдіргендер болған жоқ. Сауда үйінде таңғы сағат 9-дан ғимарат жабылғанша жұмыс істейміз.
Болат Никанов, қала тұрғыны:
– Вакцина салдырып жатырмыз. Өзіміздің денсаулық үшін. Ауырмайық, бәрі тыныш болсын.