427,82 518.00 5.92
+7 (7172) 757 485 24kz@khabar.kz
ҚАЗ

Киік құралайымен суретке түсуге тыйым салынды

  • 170
  • UPD: 23:58, 20.05.2021

Экология министрлігі киік төлдеген кезде оны фотоға немесе видеоға түсіруге тыйым салды, деп хабарлайды «Хабар 24».

Мұның алдында тілшілер де, әртістер де шаранасы кеппеген киіктің құралайын құшақтап түскен суреттерін әлеуметтік желіге жарыса жариялап, елдің наразалығын тудырған еді.  

«Томирис» фильмінде басты рөлді сомдаған Альмира Тұрсынның киіктің құралайын құшақтап түскен суреті жұрттың наразылығын тудырды. Актрисаның өзі фотоссесияны қоршаған ортаны қорғау министрлігінің рұқсатымен жасағанын мәлімдеді. Тіпті ақбөкенге зиян тигізбес үшін түсірілімнің жедел өткенін және төлді аса сақтықпен ұстағанын айтады. Ал мамандар киіктің төлдеу кезеңінде адамның түз тағысына жуымағаны жөн дейді. 

Айтуар Туғанбеков, зоолог:

– Адам иісі сіңген төлді енесі үркіп, бауырына алмай қояды. Осы түсірілімде көрсетілген киік баласының тең жартысы азықсыз қалып өліп қалуы да бек мүмкін. Фотосессияға рұқсат берген экология министрлігі алдымен табиғат қорғау принциптеріне сүйенуі керек. Нақтырақ айтсақ, табиғи процеске барынша кедергі жасамау керек, әсіресе жануардың төлдеуі кезінде бұл мәселе маңызды. Ал жаңа туған құралаймен суретке түсу мұндай принципке сай келмейді.

Ал қоршаған ортаны қорғау министрлігінің өз уәжі бар. Сала мамандарының айтуынша, киік төлін адамның ұстағанынан, оған еш зиян келмейді.

Жүсіп Қусайын, қорықшы:

– Өзім екі жыл бұрын бинокльмен қарап, киіктің лағын қашып бара жатып, ар жағынан анасы келіп соны емізген. Өз көзіммен көргем.

Қызыл кітапқа енген киіктің жаңа туған төлін құшақтап суретке түсу кейінгі кезде сәнге айналған тәрізді. Осыған орай экология министрлігі бейне фото түсірілімдерге толық тоқтау салды. 

Айта кетейік, осы салаға жауапты экология, геология және табиғи ресурстар министрінің орынбасары болған Ерлан Нысанбаев қызметінен босатылды. Оның орнына Әлия Шалабекова тағайындалды. Ол осыған дейін ведомствоға қарасты трансшекаралық өзендер департаментін басқарған.     

Әнел Еділқызы

Хабар 24 телеарнасы