424,44 504.55 5.80
+7 (7172) 757 485 24kz@khabar.kz
ҚАЗ

Қазақстан мен Ресей шекарасындағы бекеттер жаңартылады

  • 117
  • UPD: 18:47, 28.06.2021

Бұл бастаманы біздің тарап көтерді. Сенат Төрағасы Мәулен Әшімбаев Ресей Федерациясы Федералдық Жиналысы Федерация Кеңесінің Төрайымы Валентина Матвиенкомен кездесуде бекеттердің рөлін атап өтті.

Мұндай өткізу пункттерінің тиімді жұмысы екі елдің де азаматтары мен бизнес өкілдері үшін маңызды. Сол себепті Сенат Спикері аталған бекеттерді қайта жаңарту бойынша бірлескен шараларды жандандыру қажеттігін тілге тиек етті.

Мәулен Әшімбаев, ҚР Парламенті сенатының төрағасы:

– Қазіргі таңда шекарада 30 өткізу бекеті жұмыс істеп тұр. Оның 17-сі көпжақты, ал қалған 13-і екіжақты. Бұл өткізу бекеттері екі елдің де азаматтары үшін аса маңызды. Жыл сайын сол бекеттер арқылы 44 миллионнан астам азамат және 7,5 миллион автокөлік өтеді. Қазіргі таңда Қазақстан мен Ресей арасындағы тауар айналымының айтарлықтай бөлігі шекара маңындағы өңірлерге тиесілі. Бұл – бизнес өкілдері мен көлік-логистика компаниялары аталған өткізу пункттерін өте белсенді қолданады деген сөз.

ЕКІ ЕЛ АРАСЫНДАҒЫ ӨЗЕНДЕР ТАРТЫЛЫП БАРАДЫ

Сонымен қатар тараптар трансшекаралық өзендердің экологиялық мәселесіне де айрықша көңіл бөлді. Мәулен Әшімбаев бұл бағытта оңтайлы шешім қабылдау өзендерді жағалай қонған елді мекендердің әлеуметтік-экономикалық дамуына және жергілікті азаматтардың өмір сүру сапасын жақсартуға тікелей ықпал ететінін атап өтті.

Мәулен Әшімбаев, ҚР Парламенті сенатының төрағасы:

– Бірінші кезекте Жайық өзеніндегі су деңгейінің төмендеп кетуі сөз болып отыр. Соған байланысты өңірдегі экологиялық жағдай нашарлап кеткені белгілі. Аймақ тұрғындары үшін аталған өзеннің стратегиялық маңызы зор. Ауыл шаруашылығының дамуы, азық-түлік қауіпсіздігін қамтамасыз ету осы өзеннің жағдайына тікелей байланысты.

Кездесуде ғарышты игеру және «Байқоңыр» кешенін бірлесіп пайдалану бағыттары бойынша өзара іс-қимылды дамыту мәселесі де талқыланды. Ал өз кезегінде Ресей Федералды Жиналысы Федерация Кеңесінің Төрайымы Қазақстанның тұтастығына қатысты пікір білдірді. Екі ел арасында 400-ден аса келісім құжаты бекіген. Осының өзі көп «жайттан хабар берсе керек», – деді Ресей өкілі.

Валентина Матвиенко, Ресей Федерациясы Федералдық жиналысы Федерация Кеңесінің төрайымы:

Елдер арасында 400-ден аса келісім құжаты бар. Бұл мемлекетаралық ынтымақтастықтың заңды және құқықтық базасы. Осынау байланысқа Қазақстанның да, Ресейдің де Парламенттері үлес қосты. Мемлекетаралық құжаттардың негізгі бағыты егемендіктің, тәуелсіздіктің, аумақтық тұтастықтықтың мойындалуын қамтып жатыр. Және біз бір-біріміздің ішкі ісімізге араласпаймыз. Бұл ешқашан өзгермейтін басты негіз.

 

Хабар 24 телеарнасы