Нұр-Сұлтанда тағы 21 тұрғын үйдің құрылысы аяқталды

Нұр-Сұлтан қаласының әкімі Алтай Көлгінов Instagram парақшасында Елорда күніне орай тағы 21 тұрғын үйдің құрылысы аяқталғанын, олардың ішінде «Ақерке-2», «Жастар-4», «Талисман», «Арыстан» және т.б. тұрғын үй кешендері бар екенін мәлім етті, деп хабарлайды қала әкімдігінің ресми сайты.

«Құрылысы ұзаққа созылған үйлерді аяқтау бойынша жүйелі жұмыстар жүргізудеміз. Елорда күніне орай тағы 21 тұрғын үйдің құрылысы аяқталды. Олардың ішінде «Ақерке-2», «Жастар-4», «Талисман», «Арыстан» және т.б. тұрғын үй кешендері бар.

Осылайша, тағы үш мың үлескердің қиындығы шешілді. Олар көптен күткен пәтерін алды. Қазір тұрғындарға пәтерінің құжаттарын беру және басқа да құжаттық процедуралық жұмыстар жүргізіліп жатыр.

Бүгін «Ақерке-2» тұрғын үй кешеніне бардым. Бұл көп пәтерлі тұрғын үй кешенінің құрылысы жылдар бойы тоқтап тұрды, нысанда тиісті жұмыстар жүргізілген жоқ. Тұрғын үй кешенінің қаңқасы аяқталып, терезелер, есіктер, лифтілер орнатылды. Жобалық-сметалық құжаттаманы дайындап, үйдің қасбеті бойынша жұмыстар жүргіздік. Үлкен проблемалардың бірі гараждарды бұзу болды. Гараждарды сатып алу бойынша қажет жұмыстар жүргізілді, бұл инженерлік желілерді үйге жеткізуге мүмкіндік берді. Бұл тұрғын үй кешенінде 150-ден астам отбасы бар.

Мысалы, елордада 2019 жылдың жазында құрылысы ұзақа созылған 150-ден астам үй болды. Мемлекет басшысының тапсырмасы негізінде құрылыс жұмыстарын аяқтау бойынша жүйелі жұмыстар жүргізудеміз. 2019 жылдың жарты жылдығында 13 көппәтерлі тұрғын үй кешенін салып, пайдалануға бердік. Өткен жылы 20 үй аяқталды.

Биыл елордада тағы 57 проблемалық көппәтерлі тұрғын үй кешенінің құрылысын аяқтауды жоспарлап отырмыз. Бұл 7 мыңнан астам үлескердің мәселесі шешіледі деген сөз.

Үлестік құрылыстың әрбір нысаны бойынша қадамдық іс-шаралар жоспары бар», - деп жазды елорда әкімі.