Нұр-Сұлтанда инфекциялық төсек-орын жүктемесі 58%-ке дейін төмендеді

Нұр-Сұлтанда коронавируспен ауыратын науқастар үшін қосымша ашылған орындардың арқасында төсек-орын жүктемесі 71%-ден 58%-ке дейін төмендеді, деп хабарлайды қала әкімдігінің ресми сайты.

Мәселен, бүгін таңертең КВИ-мен күресу үшін жалпы саны 2 505 орны бар 14 стационар ашылып, жүктеме 71%-ті құраса, онда жаңа инфекциялық орындар ашылғаннан кейін жүктеме 58%-ке төмендеді. Қазіргі уақытта ашылған инфекциялық төсек саны үш мыңнан асады.

Естеріңізге сала кетейік, бұған дейін коронавируспен ауырғандардың көбеюіне байланысты қалада екі аурухана инфекциялық стационарға ауыстырылған болатын. Олар: Қалалық психикалық денсаулық орталығы және ҚР Қорғаныс министрлігінің Бас әскери клиникалық госпиталі. Жалпы төсек-орын қуаты – 300 орын.

Бүгін, яғни 9 шілдеден бастап №1 Көпбейінді қалалық аурухана ковидтік стационар ретінде іске қосылды. Бұл ауруханада тағы 600 төсек-орын ашылды.