415,12 450,91 7,40
+7 (7172) 757 485 24kz@khabar.kz

Ақтауда биыл ашылатын мектептерге мұғалімдер ерекше тәсілмен қабылданып жатыр

  • 385
  • UPD: 10:24, 13.08.2021

Ақтауда биыл ашылатын жаңа білім ордасына мұғалімдер ерекше тәсілмен қабылданып жатыр, деп хабарлайды «Хабар 24».

№19 мектеп-гимназиясына педагогтарды іріктеуге алғаш рет қалалық білім бөлімі араласпай отыр. Қоғам белсенділерінен арнайы комиссия құрылып, ұстаздардың үздіктері түрлі сұраққа жауап беру арқылы таңдап алынады. Бір қызығы, 1 пәнге 100 үміткерден келген.

Әйгерім Ашықбаева, тілші:

- 27 жастағы Ақансері Сахиев дене шынықтыру пәнінің мұғалімі болудан үмітті. Биыл осы мамандық бойынша ЖОО-ны тәмамдаған. Бұрын бокс, волейбол сияқты спорт түрлерімен шұғылданған. Алайда, қазір 4 баланың әкесі жұмыссыз жүр. Түйіндемесін түрлі жерге тапсырса да, нәтиже болмапты. Енді әділ іріктеуден сүрінбей өтуге ниетті.

Ақансері Сахиев, қала тұрғыны:

- Қаланың төңірегінде бармаған мектебім қалмады, жұмыс жоқ деді. Кейбіреулері жұмыс бар деді, бірақ пара сұрады. Бермеймін дедім, алмады. Осы іс-шара парақорлықты алдын алу үшін жасалып жатқан деп ойлаймын. Бастысы, директор мен ұстаз арасындағы параны жою мақсатында білім сапасын көтеру үшін қолдаймын. Сұрақтар қиын болған жоқ, спорттың қандай пайдасы бар сияқты сұрақтар қойды.

Педагогтарды іріктеу осы дүйсенбіде басталған. 13 пәннен 1 мыңға жуық үміткер келіпті. Құрылған комиссия құрамында өңірге белгілі қоғам белсенділері, жұмыспен қамту орталығының өкілдері және адалдық алаңы жобасының мүшелері бар. Олар алдымен түйіндемені қарап, мамандығына қарай сұрақтар қояды.

Айта кетейік, білім бөлімінің мәліметінше, арнайы комиссия құрудың негізгі себебі – үміткерлер өте көп болған.

Жұлдыз Санақаева, бақылаушы:

- Бір маман орнына 20-30 шақты адам келіп жатыр. Комиссия мүшесі жас мамандарға, жұмыссыздарға көп көңіл бөліп жатыр. Жұмысы барлар да келіп жатыр. Комиссия мүшесі педагогтарға заңдар туралы, енгізілген өзгерістер туралы, жеке қасиетін анықтау мақсатында қызығушылықтары сұрап жатыр. Мүлде сәйкес келмейтін мұғалімдер бар. Мысалы, ағылшын тілінің маманы мүлде сөйлей алмайды. Үлкен стажы бар апай әліппенің негізін қалаушы кім дегенге жауап бере алған жоқ.

Қамар Жұмағанбетова, мұғалім:

- 22 жылдан бері ұстаз болып жұмыс жасаймын. 2 мектепте жасадым, қазір колледжде жасап жатырмын. Жастарды тәрбиелеп, дәріс беріп. Бұрын жұмысқа кіргенде түйіндеме беріп кіргенбіз. Қазіргі әдіс сыбайлас жемқорлыққа қарсы жақсы әдіс деп ойлаймын.

Қаладағы 34 шағынауданда орналасқан білім ордасы 1200 орынға шақталған. Қазір жаңа оқу жылына 1700-ден астам оқушы қабылданыпты. 73 сынып дайындалған. Өтініштер әлі де түсіп жатыр. Ата-аналар үздік мұғалімдерге баласын оқытуға асық.

Әйгерім Ашықбаева, тілші:

- Іріктеу бүгін аяқталады. Осылайша, жаңа оқу жылында жүзден жүйрік, мыңнан тұлпар атанған 150 педагог 19 мектеп-гимназиясында қызметін бастайды.

Авторлары: Әйгерім Ашықбаева, Саламат Бекбаев

Хабар 24 телеарнасы