423,91 504.32 5.82
+7 (7172) 757 485 24kz@khabar.kz

Жетісу өңіріне келетін туристер саны артқан

  • 149
  • UPD: 19:33, 22.08.2021

Алматы облысына келетін туристер саны былтырғымен салыстырғанда 25 проценке көбейген, деп хабарлайды «Хабар 24».

Яғни жарты жылдың ішінде өңірге 530 мыңнан аса адам келген. Туристердің көбі Алакөлдің шипалы суына шомылып, Көлсайда демалады.

Көлсай –Жетісудағы ең көрікті жерлердің бірі. Ол жоғарғы, ортаңғы және төменгі Көлсай деп аталатын үш көлден тұрады.

Шыңғыс Қалиден, тілші:

- Төменгі Көлсай көлі теңіз деңгейінен 1800 метр биіктікте орналасқан. Оның жалпы аумағы – 33 мың шаршы метр. Ал тереңдігі 40 метрге дейін жетеді. Тұмса табиғатты көруге құштар туристердің көбі осы жерге келеді.

Алатаудың баурайындағы көз тартатын көрікті мекенге биыл 110 мыңнан астам аса адам келді. Таулары қарағаймен көмкерілген аймақта туристер үшін бірнеше бағыт әзірленген. Сонымен қатар таза ауамен тыныстап, қайталанбас табиғат сұлулығын тамашалап қайтуға болады.

Қайыпберген Мұратбаев, турист:

- Қазақстанның Алтын ордасы, осы табиғатта дем алғанның өзі рахат. Қазақтың мықты жері деуге болады.

Көлсайдағы этноауылда халқымыздың өткен ғасырдағы тұрмыс-тіршілігі дәріптелген. Онда құсбегілік, саятшылық сынды бекзат өнермен де танысуға мүмкіндік бар. Бұған әсіресе шетелдіктердің қызығушылығы жоғары.

Юсиф Огги, Мысыр елінің азаматы:

– Мен мұндай жерге келгенімді мақтан етемін. Өзімді өткен ғасырларда өмір сүрген адамдардың ортасына түскендей әсер алдым. Қазақ халқының салт-дәстүрімен таныстым.

Айдынды Алакөлде де биыл туристердің қарасы қалың. Тіпті шомылу маусымы қызған шақта Ақши, Көктұмадағы екі жүзден астам демалыс кешенінде орын болмады.

Азамат Мұхаметкәрімов, Алматы облыстық туризм басқармасы басшысының м.а:

- 2021 жылғы 6 ай көрсеткіші бойынша Алакөл көлінің жағалауына 230 мың адам келген. Қапшағай су қоймасының көліне 250 мыңдай адам. Балқаш көлінің жағалауына 6 мыңдай адам келген. Бұл былтырғы көрсеткіштермен салыстырғанда салыстырғанда едәуір өскені байқалады. Бұл көрсеткіштер туризм саласының өз қалпына келе бастағанын өсу динамикасын байқалады.

Алматы облысында Алтынемел, Шарын, Көлсай сынды 5 ұлттық парк бар. Одан бөлек, өңірдің оңтүстігінде қысқы туристік кешендер жұмыс істейді. Сала мамандары жыл соңына Жетісу жеріне келетін туристер саны 1 млн 400 мыңға жуықтайды деп болжам жасап отыр.

Шыңғыс Қалиден, Қуаныш Түргенбаев

Хабар 24 телеарнасы