423,91 504.32 5.82
+7 (7172) 757 485 24kz@khabar.kz

Ауғанстанда қанша қазақ бар

  • 237
  • UPD: 20:11, 22.08.2021
Ауғанстанда қанша қазақ бар Известия

Ауғанстанда барлығы 15-ке жуық қазақ отбасы тұрады, деп хабарлайды «Хабар 24».

Бұл шамамен 200-дей адам. Сыртқы істер министрлігінің ресми өкілі Айбек Смадяровтың мәліметі осындай. Оның айтуынша, Президент Қасым-Жомарт Тоқаев осы елдегі этникалық қазақтардың қауіпсіздігін қамтамасыз етіп, тарихи отанына қайтаруға көмек көрсету бойынша арнайы тапсырма берген. Осыған байланысты мәселе Ауғанстандағы елшіліктің ерекше бақылауына алынды. Қазір Кабулде біздің елдің оншақты дипломаты штаттық режимде жұмыс істеп жатыр. Олардың қатарында азаматтардың этникалық қазақ екенін анықтайтын арнайы комиссия құрылған.

Айта кетейік, Кабулдағы Қазақстан елшілігін Талибан ұйымының өкілдері күзетіп тұр. Тәліптер Ауғанстан астанасын басып алған күні біздің елшілікке келіп, жұмысты бұрынғыша жалғастыра беруді айтқан. Сондай-ақ дипломаттардың қауіпсіздігін қамтамасыз етуге уәде берген. 

Айбек Смадияров, ҚР СІМ халықаралық ақпарат комитеті төрағасының орынбасары:

– Кейбір БАҚ Ауғанстанда бірнеше мың этникалық қазақ тұратыны туралы тексерілмеген ақпарат таратты. Бұл шындыққа сәйкес келмейді. Осыған байланысты ақпаратты мұқият тексеріп, қажетсіз дүрліктірмеуді сұраймыз. Біз тиісті жұмыс жүргізіп жатырмыз және Ауғанстандағы қазақтармен тұрақты байланыстамыз.

Хабар 24 телеарнасы