425,73 504.32 5.82
+7 (7172) 757 485 24kz@khabar.kz

Әкімдіктегілердің «Хабар 24» тілшісіне күш көрсетуі: Аида Балаева оқиғаға қатысты пікір білдірді

  • 137
  • UPD: 15:02, 25.08.2021
Әкімдіктегілердің «Хабар 24» тілшісіне күш көрсетуі: Аида Балаева оқиғаға қатысты пікір білдірді

Алматы қаласының Алатау ауданы әкімдігінде «Хабар 24» тілшісіне қарсы қолданылған шараға қатысты министр Аида Балаева пікір білдірді.

«Өздеріңізге мәлім, Алматы қаласы Алатау ауданы әкімдігі қызметкерінің журналист Ақбөпе Тәңірбергенге күш қолданған теріс әрекеті интернет желісінде қызу талқыланып жатыр. Аудандық әкімдіктің жауапты тұлғаларының бұған қатысты еш шара қолданбауы мәселені тіпті де ушықтырып отыр. Бұл, әрине, өте өкінішті және біздің бүгінгі «еститін мемлекет», «ашық әкімдік» қағидаларына қайшы келетін жағдай. Журналистердің құқығын бұзуға, олардың ресми жұмысына кедергі келтіріп, күш көрсетуге ешқашан жол берілмеуі керек. Олар өздерін қай жерде де еркін сезінуі тиіс. БАҚ өкілдері еліміздің тиісті заңнамалары мен нормативті-құқықтық актілеріне сәйкес қажетті толыққанды ақпарат алуға қай кезде де құқылы.

Бұл жағдайға қатысты Алматы қаласы әкімдігінің басшылығы қызметтік тексеру жүргізіп, тиісті шаралар қабылдауы қажет деп санаймын. Кінәлі тұлғалар жауапқа тартылуы тиіс. Алдағы уақытта қай жерде болсын БАҚ өкілдеріне қатысты бұндай келеңсіз жағдайларға жол берілмеуі қажет», - деді министр.

Бұған дейін аталған әкімдік күзетшілері арнамыздың тілшісі Ақбөпе Тәңірбергенді күштеп шығарып жібергенін хабарлағанбыз.

Ақбөпе Тәңірберген арнамыздағы «Әкім» бағдарламасын жүргізеді.

Хабар 24 телеарнасы