425,75 504.32 5.84
+7 (7172) 757 485 24kz@khabar.kz

Тісті кімдер тегін емдете алады?

  • 454
  • UPD: 09:25, 12.09.2021

Тісті тегін емдеткіңіз келе ме? Біле жүріңіз. Бұл тек міндетті әлеуметтік медициналық сақтандыру қоры арқылы жүзеге асады, деп хабарлайды «Хабар 24».

Ол үшін мемлекет есебінен жеңілдік алған азаматтар қатарында болсаңыз болғаны. Стоматологиялық қызметке жүгіну үшін алдымен қайда бару керек?

Тіс ауырса, алып ұшып ақылы емханаларға жүгіретіндер бар. Оны емдетудің қай түрі болмасын қалтаңа салмақ салады. Алайда қазір белгілі бір санаттағы адамдарға стоматологиялық қызметтер тегін.

Тек ақпаратқа қанық болған абзал. Мемлекет есебінен жеңілдік алған адам болсаңыз, бұл ем-шараның барлығы МӘМС аясында ақысыз жасалады. Жарымжан бала өсіріп отырған жұмыссыз жандар да осы көмекті тегін ала алады.

Нұрлыбек Қабдықапаров, «Әлеуметтік медициналық сақтандыру қоры» қалалық филиалының директоры:

- Бізде МӘМС қалалық филиалы елордада 36 емдеу мекемесі болатын болса, солардың барлығымен келісімшарт жасап, қадағалап отырамыз. Осы бір жылдан аса осы стоматологиялық көмектің бәрі медициналық алғашқы медкөмек жасайтын емханалар қосалқы келісімшарт арқылы көмек жасайды. Емдеу емханалары сол стоматологиямен жұмыс істейді.

Елімізде ересектермен қатар балалар арасында да тіс жегісі мен оның асқынған түрі өте көп кездеседі дейді мамандар. Бұл ең әуелі ауыз қуысын дұрыс күтпегеннен болады. Жұмсақ тағамның да әсері бар. Тіс құртының алдын алмаса, буыны бекімеген баланың жақ сүйегіне дейін қисайып, тісі өспей қалуы мүмкін көрінеді. Сондықтан тіс ауырған бойда жергілікті тіркелген емханаға барып, дәрігерден стоматологияға жолдама алу қажет. Жүкті әйелдер мен 18 жасқа толмаған балаларға бұл қызметтің барлық түрі ақысыз. Медициналық сақтандыруда арнайы үш пакет қарастырылған.

Жанар Қазыбекқызы, қалалық штаттан тыс бас тіс дәрігері:

- Өзінің тіркелген емханасы бойынша барып дәрігерінен жолдама алады. Қазір карантинге байланысты сол стоматологияға жазылады. Профилактикалық жұмыс өте маңызды. Сондықтан жарты жылда бір рет тіс дәрігерге көріну керек.

Тісі таза, сау адамның - дені сау. Балалардың тісін 2 жастан бастап, күту керек. Аурудың алдын алу мақсатында емханада ремтерапия жасатуға болады екен. Яғни, минералдық лакпен қаптатса болады. Ал шұғыл түрде ем қажет болған жағдайда Медициналық сақтандыру пакеті бойынша науқасқа талон беріледі.

Айнұр Қуатқызы Ерзат Зайтхан

Хабар 24 телеарнасы