Қарулы Күштердің құрамалары мен бөлімдері елдің батысы мен оңтүстігіне жіберілді

2021 жылғы қыркүйектің басынан бастап өтіп жатқан кенеттен тексеру шеңберінде әскерлер Қазақстанның батыс және оңтүстік өңірлеріне жіберілді, деп хабарлайды Хабар 24 ҚР Қорғаныс министрлігінің баспасөз қызметіне сілтеме жасап.

Маневрға ведомствоаралық, түраралық әскер топтарынан жалпы саны тоғыз мыңға дейін адам, үш мыңға жуық қару-жарақ пен әскери техника, оның ішінде 66 ұшу аппараты мен сегіз корабль тартылды.

Қарулы Күштерді алыс қашықтыққа жылжуға әзірлікте ұстау қажеттілігі Қазақстан аумағының ауқымдылығына байланысты.

Әскерлерді жауынгерлік техникамен, теміржол және әуе көлігімен, оның ішінде азаматтық авиация мүмкіндігін пайдалана отырып, әртүрлі тәсілдермен жеткізу жүзеге асырылды.

Атап айтқанда, алдыңғы шептегі бөлімшелер әскери-көлік және азаматтық авиация ұшақтарымен жеткізілді. Құрлық әскерлерінің бөлімдері мен бөлімшелері жауынгерлік техникасымен бірге өздеріне таныс емес полигондарға теміржол көлігімен жеткізілді. Жауынгерлік оқу-жаттығу міндеттерін орындау шеңберінде бөлімшелер белгіленген аудандарда орналасып, оларды инженерлік тұрғыдан жабдықтады.

Армиялық және майдандық авиация топтары жедел әуеайлақтарға және Ақтау – Жаңаөзен автомобиль жолының әуеайлақтық учаскесіне қайта орналастырылды.

Әскери-теңіз күштерінің корабльдері Каспий теңізінің акваториясында корабльдердің орналасу пунктерін күзетуді және қорғауды жүзеге асырады.

Одан әрі құрамалар мен бөлімдер күштер мен құралдарды іс жүзінде қолдануға байланысты оқу-жаттығу жауынгерлік міндеттерді орындауды жалғастырады. Әскерлер әрекет етуінің толықтығын және сапасын Қарулы Күштердің Бас штабы бағалайтын болады.