Шымкентте карантин режимі ұзартылды

Шымкент қаласының Бас мемлекеттік санитар дәрігері Әбдіманап Төлебаев қала аумағында карантин режимін ұзарту туралы жаңа қаулы шығарды, деп хабарлайды «Хабар 24».

Шымкент қаласының Бас мемлекеттік санитариялық дәрігерінің 2021 жылғы 25 қыркүйектегі №31 «Шымкент қаласының аумағында коронавирустық инфекцияның таралуын алдын алу бойынша шектеу шараларын және карантин режимін ұзарту туралы» қаулысы шықты.

«Шымкент қаласында карантин режимі және коронавирус инфекциясының таралууының алдын алу жөніндегі шектеу іс-шаралары эпидемиологиялық жағдай тұрақталғанға дейін ұзартылсын»,– делінген құжатта.

Қаулыға сәйкес, 65 жастан асқан адамдардың қалада жүруі шектеледі. Қоғамдық орындарда бетперде кию, әлеуметтік арақашықтықты сақтау және антисептиктерді пайдлану талаптары қатаң сақталады.

Сауда орындарында, халыққа қызмет көрсету саласындағы нысандарда және адамдар көп жиналуы мүмкін орындарда күнделікті дезинфекциялық іс-шаралар жүргізіледі.

Қоғамдық тамақтану орындарда кальян шешуге тыйым салынады. «Ashyq» жобасына қатысушы барлық объектілер үшін сағат 00.00-ге дейін, «Ashyq» жобасының көшбасшылары үшін – сағат 02.00-ге дейін; демалыс күндері – сағат 02.00-ге дейін, қызметкерлер мен келушілерде «жасыл мәртебе» болған жағдайда (вакцинация, сынама алған кезден бастап 7 тәуліктен аспайтын теріс нәтижесі бар ПТР тест, тұрақты медициналық қарсы көрсетілімдері бар, ауырып жазылған адамдар соңғы 3 ай ішінде) «Ashyq» жобасының көшбасшылары үшін – сағат 02.00-ге дейін рұқсат етіледі.