Соңғы бірнеше тәулікте облыс орталығындағы жанармай станцияларының дені жұмысын тоқтатқан. Ал қалғандары тек талонмен ғана саудалауға көшті.
Сәйкесінше пропан құны да шарықтап кеткен. Бұған дейін литрі 58-62 теңге аралығында сатылып келсе, қазір 75 теңгеге дейін қымбаттап отыр. Облыстық тұрғын үй-коммуналдық шаруашылығы және энергетика басқармасы өкілдері бұл жайтты нарық талабымен түсіндірді. Себебі жанармай бағасы электрондық сауда-саттық нәтижесімен тікелей байланысты. Ал көлік отынының тапшылығын тасымалдың тұралап қалуымен байланыстырып отыр. Қазір облысқа 13 мың тоннаға жуық сұйытылған газ қажет болса, қазан айының басынан бері тек 958-і ғана жеткен. Алайда бұл мәселе апта соңына дейін шешімін табуы тиіс.
Самат Лепесов, облыстық ТҮКШ және энергетика басқармасының бөлім басшысы:
– Ай басынан бері темір жолдағы жүк тасымалы көлемінің артуына байланысты газ-цистерналарын жөнелтуде кедергілер туындаған. Газ тапшылығының пайда болуы да сондықтан. Жанармай толтырылған вагондар қазір станцияларда өз кезегін күтуде. Мәселен Жем және Қандыағаш станцияларында 16 вагон-цистерна тұр.