430,43 492.25 5.92
+7 (7172) 757 485 24kz@khabar.kz

Газ тапшылығы мәселесі қашан шешіледі?

  • 60
  • UPD: 23:41, 10.11.2021

Алматыда автогаз тапшы. Қаладағы жүздеген бекеттің көбінде «газ жоқ» деген қағаз ілінген. Бірқатары талонмен ғана сатып отыр. Осыған байланысты жүргізушілер көлігіне көгілдір отын таппай сабылды. Жалпы бұл жағдай еліміздің өзге өңірлерінде де жиі кездеседі. Газ тапшылығы мәселесі неге шешілмей отыр? 

Алматы қаласының тұрғыны Ермұхан Қаратаев өткен жылы көлігіне газ қондырғысын орнатқан болатын. Себебі газ арзан әрі оңай табылушы еді. Ол кезде автогаздың бір литрі 65 теңгеден сатылыпты. «Көгілдір отын құны бір жылда Алматыда екі есеге қымбаттағаны былай тұрсын, автогаздың өзін іздеп жүретін хәлге жеттік», – дейді Ермұхан.

Ермұхан Қаратаев, қала тұрғыны:

– Екі-үш күн болды, газ жоқ еш жерде. Мен осы Қаскелеңнен бері қарай келе жатырмын. Оныншы май құю бекетіне кіріп тұрмын. Осында ғана бар екен. Көп жерде талонмен беріледі. Қазір бұл жерде 116 теңге деп тұр.

Көлік иелерінің айтуынша, автогаз тапшылығы өткен аптада басталған. Көптеген бекеттер «газ жоқ» деген жазбаны терезелеріне іліп тастапты. Ал бірқатары тек талонмен ғана сатуға көшкен. Оған қоса көгілдір отынның құны бір аптада 100 теңгеден 135 теңгеге дейін қымбаттап кеткен.

Статистика бойынша, Алматыда жарты миллионға жуық автокөлік тіркелген. Оның мыңнан астамы газға ауысқан. Ал республика бойынша газбен жүретін көліктердің саны 300 мыңнан асады екен. Тапшылық барлық өңірде байқалып отыр. Энергетика министрлігі көгілдір отынның жетіспеушілігін газбен жүретін көліктер санының артуымен және сұйытылған газ өндіретін қос зауыттың бір уақытта жөндеу жұмыстарына жабылуымен түсіндірді.

Мұрат Жүребеков, ҚР Энергетика министрінің бірінші орынбасары:

– Павлодар мұнай өңдеу зауытын қазанда жөндеуге шығардық. Бірақ ТШО-ны айтатын болсақ, онда үш жылда бір рет қана күрделі жөндеу жасалады. Сол мерзім биылға тап болды. Сол себептен осындай жағдайға тап болдық.

Министр орынбасарының айтуынша, қазір ішкі нарыққа қажетті автогаздың 70 проценті электронды сауда алаңында сатылады екен. 1 литр газдың құны 90 теңге. Әрі қарай тасымалдаушылар мен бөлшек саудамен айналысатын бекеттердің табысы қосылады. Министрлік өкілі заводтардағы жөндеу жұмыстары аяқталса автогаз мәселесі тұрақталады деп сендірді.

Авторлары: Аршын Кемелжан, Радик Жакупов

Хабар 24 телеарнасы